EGH-o lekka pora on·aniko namdapatchina dabie AHAM, a·dokni CM-na sedoata

TURA: East Garo Hills a·jao lekka pora on·aniko namdapatchina gita dabie, A·chik Holistic Awakening Movement (AHAM) Eastern Zone, a·dokni Chief Minister Conrad K Sangma-na sedoataha.
Skanggipa AHAM, Williamnagar-o Horticulture University-ko kulichina a·dokni Chief Minister-ko didiataha.
“Williamnagar aro uni wilwilao gama ge·anirangko dakna namen namgipa biap ong·a aro ia biapo Horticulture University-ko kuligenchimode ian chatro chatrirangni namgninasan ong·aigija, ia jolrango gama ge·anirangko tang·doatna dakchakani ong·gen,” ine AHAM-EZ-ni general secretary Aimarong K Marak, Chief Minister-na sedoatgipa chittio janapataha.
Williamnagar-o rikenggipa Polytechnic-ko ta·rake matchotatchina gitaba AHAM, a·dokni Chief Minister-ko didiataha.
“Williamnagar-o rikenggipa Polytechnic-ko matchotchipkujaengani a·selan jolni chadamberang, dingtang dingtang janggi tangani cholrangko dake ra·na man·kujaenga. Uni gimin ia Polytechnic-ko ta·raken matchotatna nangenga,” ine AHAM-EZ-ni general secretary parakataha.
Williamnagar Govt College-o B.Com aro B.Sc Degree course-rangko a·bachengatchina gitaba AHAM, a·dokni Chief Minister-ko didiataha.
“Williamnagar-o chubata gadangrango poraina gita chadamberang cholrangko sandiengani gimin ia college-o B.Com aro B.Sc course-rangko a·bachengataniara, a·jani chadamberangna chubata gadangni lekka porako ra·anio namgipa chol ong·gen,” ine Marak parakataha.
East Garo Hills a·jani Songsak aro Nengkra songo Eklavya Residential School-ko kulichina a·dokni Chief Minister-ko didiatskaengon, iandakgipa skulrangara Tribal-rangna aro chol ong·pagijagipa chatro chatrirangna dingtang dingtang namgnirangko on·ani gimin iandakgipa skulko Songsak aro Nengkra songrangoba kuligenchimode ian songni nokni chadamberangna aro bi·sarangna bang·en namgni ong·gen ine AHAM-EZ parakataha.
Indake ong·engon, East Garo Hills a·jao lekka porako nambate on·na man·na gita namnamgipa skigiparangkoba nangengani gimin District Institute of Education & Training (DIET)-ko kulichina gitaba AHAM-EZ, a·dokni Chief Minister-ko didiataha.