TURA: Meghalaya a·dok aro Bangladesh a·songni gisepo kilometer 443 simarang dongani a·sel ia simarang gitan gipin a·songrangoni niam gri napsrukani, niam gri bading chiwalgrikani aro ma·manti ong·gija kamrangko ka·na man·enga ine A·chik Conscious Holistically Integrated Krima (ACHIK) dol parakatenba, ia simarango ong·gija dakanirangko aro niam gri napsrukanirangko nambate nirokchina a·dokni Chief Minister Conrad Sangma-ko didiataha.
Meghalaya aro Bangladesh a·songni simarango niam gri badingsrukani, niam gri napsrukani aro ma·manti dake ong·gija kamrangko nambate champengna man·na gita ia simarango Border Patrol-rangko bariatchina ACHIK dabiangaha.
“Garo Hills aro Bangladesh a·songni apalbegipa simarango, mongsongbate da·o Bangladesh a·songo so·sojengjeng ong·anirangko nikna man·engani gimin gipin a·songrangoni niam gri napsrukanirangko aro niam gri badingsrukanirangko champengna Border Patrol ba simarango re·roroe nirokanirangko bilakbatatna nangenga. Patrolling ka·aniko bariatanichi, a·song damgnini gisepo niam gri badingsrukanirangko, mande palsrukaniko aro ong·gija dakgipa manderangni re·ruraanirangko champengna man·gen aro ian sima jolrango songdongenggipa manderangnaba ka·dongatanirangko on·na man·gen,” ine ACHIK-ni general secretary Happynews R Marak parakataha.
Garo Hills aro Bangladesh a·songni simarango nambate nirikkina man·na gita simarango CCTV camera, drone aro uandakgipa chasong gitalni technology ba kolrangko jakkalchina gitaba ACHIK, a·dokni Chief Minister-na ku·pattianiko on·ataha.
“Garo Hills aro Bangladesh a·songni simarango chel·chakaniko on·na aro ong·gija dakgipa kamrangko warachakna CCTV camera, drone aro uandakgipa gital kolrangchi nirikkianirangko dakna nangchongmotenga. Simarango gital kolrangko jakkale nirikkianichi, niam gri re·ruraanirangko aro ong·gija dakgipa kamrangko champengna man·gen,” ine ACHIK parakataha.
Garo Hills aro Bangladesh a·songni simarango chel·chakanirangko aro nirok sandianiko on·anio songni nokni manderang baksa apsan kamrangko ka·china gitaba ACHIK, a·dokni Chief Minister-ko didiataha.
“Chel·chakanirangko on·anio songni nokni manderangko bak ong·ataniara, uamang an·tangtangan an·tangtangko chel·chakanio kamrangko ka·na cholko on·ani gita ong·gen aro jolni kri songni nokni manderangan an·tangtangni biaprangni gimin ma·sibatgiparang ong·a. Uni gimin simarango chel·chakanirangko aro nirok sandianirangko on·anio kamrangko nambate ka·na man·na gita jolo songdongenggipa manderang baksa nangrime kamrangko ka·na man·ode nambata,” ine ACHIK-ni general secretary parakataha.
Una agreba, a·song damgnini gisepo apsan nangrime simarango chel·chakanirangko on·na man·na gita Bangladesh sorkari baksa agangrikchina aro simarango chel·chakanirangko on·enggipa sipai dolrangna pilak nanga dakchakanirangko on·china gitaba ACHIK, a·dokni Chief Minister-ko didiataha.