Shillong: Kamna mande rakkianio mikkang nitee aro cha·chipile daka ine Meghalaya Public Service Commission (MPSC)-ni kosako matnanggipani bidingo a·dok sorkari report-ko sandigen.
Koborni manderangna aganengon, matnanganirang baditana kakket ong·a ba ong·ja, uni report-ko sorkari, jako ra·enggipa department-oniko am·chenggen aro Chief Minister-na on·gen, uni ja·mano report-ni bidingo Cabinet-ona ra·bana nanggenma nangjawa chanchigen ine Cabinet Minister, Paul Lyngdoh Bristibaro aganaha.
“Jedakgipa gadangoba ong·bo mikkang nitee dakanirangde dongna nangjawa. Mikkang nitee kamrangko ka·aha ine KSU adita sing·doanirang baksa jegalanirangko dakenga,” Lyngdoh aganaha.
Uni aganani gitade, sorkari kakketko dake on·ode uarangko namatna man·aigen.
Sing·anirangna aganchakengo, MPSC, ge·sa autonomous body ong·ani gimin report-ko uamangoniko sandichenggen ine Lyngdoh aganaha.
“Anga ka·donga je, chanchirimanirangko dakachi, jedakeba namaoba ra·bana man·gen,” Cabinet Minister agandapaha.
