SHILLONG: 2024-2025 Academic Session-onide Meghalaya Board of School Education (MBOSE)-ni Secondary School Leaving Certificate (SSLC) porikkako changgni dake ra·gnok.
Sukrobar salo Meghalaya Cabinet, Meghalaya Board of School Education (MBoSE) Regulation for the Secondary School Certificate Examination, 2011-ko taridape ra·chakahani gimin MBOSE-ni SSLC porikkako changgni dake ra·na man·gnok.
Cabinet-ni tom·aniko a·dokni Chief Minister Conrad Sangma-ni noko ong·atangaha aro ia tom·a matchotani ja·man kobor ra·timgipa manderang baksa agangrikengon, taridapgimin MBOSE-ni niamrangko cabinet ra·chakahani gimin da·o changgipin Academic Session-onide bilsiantian MBOSE-ni SSLC porikkako changgni dake ra·gnok ine a·dokni Education Minister Rakkam A Sangma parakataha.
Education Minister-ni parakatani gitade, skanggipa SSLC porikkako re·baenggipa 2025 bilsini February-March jarango ra·gen aro uni ja·man supplementary board porikkako 2025 bilsini May jao ra·skagen.
Main board porikkako subject gni ba subject gittam fail ong·gipa chatro chatrirangnade jagnini gisepon supplementary board porikkao sepiltaina chol on·gen ine Education Minister parakataha.
2025-2026 Academic Session-onide main board porikkako 2025 bilsini December jao ra·gnok aro supplementary board porikkako 2026 bilsini February-March jarango ra·skagen ineba Education Minister parakataha.
“Chatro chatrirangni namgnina iako sorkari tik ka·aha. Da·o dipet board porikkarangko bilsisani ja·mansa ra·enga indiba chatro chatrirangni poraianio bilsisako indin bon·atjana gita chinga supplementary board porikkako apsan bilsion ra·skagnok,” ine Sangma aganaha.
2026-27 Academic Session-onide basee ra·ani subject-rang dongjawaha aro nambatgipa subject mingbonga dongjawaha ineba Education Minister parakataha.
“Board porikkao pilak chatro chatrirangan subject dok gimikkon pass ka·na nanggnok,” ine ua aganaha.
