TURA: Bangladesh a·songo so·sojengjeng ong·engani gimin India a·songona napdrabana gita kenchakanirang dongtokengon, South Garo Hills a·jani simarang gita napsrukbaanirangko nirokanio Garo Students Union (GSU) Karukol regional unit-ba dakchakanirangko on·na ku·rachakaniko on·ataha.
Simarangko nirokanio BSF aro gipin sipai dolrangna dakchakanirangko on·na ku·rachakaniko on·atengon, South Garo Hills a·jani Karukol aro samba jolrango donggipa dingtang dingtang songrangara Bangladesh-oni km 20-25-mangni gitasan chel·grikaia aro Siju-ona agrede ia jolrango police station-rangba dongpaja ine GSU Karukol unit-ni dilgiparang, Bangladesh a·songoni niam gri napsrukbaanirangko nirok sandianio GSU Karukol unit-na sipai dolrangko on·e dakchakchina, South Garo Hills a·jani Deputy Commissioner-ko mol·molataha.
“Bangladesh a·songo ong·enggipa obostarangko chinga (GSU)-ba ma·sienga aro South Garo Hills baksana Bangladesh a·songni gisepo km 100-na baten simarang dongani gimin Bangladesh a·songni manderang ia simarang gita a·dokona napdrabaani cholrang dongaia. Re·anggipa August 6 tarikonin Meghalaya aro Bangladesh a·songni pilak simarangkon sorkari chipe donatahaoba Karukol aro iani samba jolrango police station-rang dongjani gimin ian ia jolrango songdongenggipa manderangna kenchakna nangani ong·enga,” ine GSU Karukol regional unit-ni dilgiparang parakatenba, Karukol aro samba jolrango donggipa simarango bilakbate nirokna man·na gita GSU-na sipai dolrangko on·e dakchakchina Deputy Commissioner-ko mol·molataha.
“Bangladesh a·songoni niam gri napsrukbaenggipa manderangko nirok sandiengon, chinga a·dokni dongimin niamrangko ja·rikna ku·rachakenga aro niamrangko jaktango ra·jana gita ku·rachakenga,” ine GSU Karukol unit-ni dilgiparang, South Garo Hills a·jani Deputy Commissioner-na sedoatgipa chittio parakataha.
