Tura: West Garo Hills (Patharkata)-oni me·chik saksa, uni segipa aro nokdangni manderangni kosako noko kajia golmal ka·a, tangka dabia aro so·otna jotton ka·ani gimin FIR segataha.
Phulbari PS-o Morina Begum minggipa uni segipa Suzzamal Shiekh, uni pagipa Ser Ali aro Goladigli songni gipinrangni kosako Sonibar salo FIR segataha.
Badi ka·gipani aganani gita, Morina Begum, bilsi bonga skang bia ka·aha unomitingde maming golmal ong·a dongjachim indiba bia ka·ani bilsi gni ja·man uamang me·chik bi·sako man·aha, indake bi·sani mikkangko nikani ja·man segipa, Morina-ko dokna aro nokdango golmal ka·na a·bacheng-aha.
“Ua an·tangni business-na tangka nangani gimin jikgipaoniko tangka dabiaha aro duk on·aha. Kangalbegipa nokdangoni ong·genchim-oba, angni nokdang, ang segipana tangka paisani gita dakchakrongaha. Indiba uni duk on·ako chakna amteljae, una tempo-o brena gita nok-dangoniko tangkako sandie on·aha ine FIR-o janapaha.
Mija August jani 8 tarik walni 7 ata bajimango uni segipa nokdangni mande-rang baksa uko doka-sataha aro sibokpilaona dokaha.
FIR-o segipani ma·gipako man·gope sakbonga manderangni bimingko mingaha.
Indake duko ga·akgipa me·chik, uni segipa aro nokdangni manderangni doke sate duk on·nani gimin uamangni kosako ja·ku de·china dabiaha.
Uandake WGH-ni SP Abraham Sangma-ko ia mamlani gimin sing·aon, ia mamlako talbatna gita sandikuenga ine aganaha.
