SHILLONG: Bangladesh a·songo so·sojengjeng ong·engani gimin Bangladesh a·songoni niam gri Meghalaya a·dokona napsrukbaaniko champengsona man·na gita mikrakbate nirikkichina Khasi Students Union, a·dok sorkariko didiataha.
Iani bidingo kobor ra·timgipa manderang baksa agangrikengon, Meghalaya aro Bangladesh a·songni gisepo bakrobegipa simarang dongani gimin ia simarang gita Bangladesh a·songoni niam gri napsrukbana man·jana gita bilakbate nirok sandianirangko dakna nangenga ine Robibar salo, KSU-ni general secretary Donald V Thabah parakataha.
“Meghalaya aro Bangladesh a·songni gisepo bakrobegipa simarang donga indiba Bangladesh a·songoni napsrukbagiparang, ia simarang gitasan ong·aigija Assam gitaba Meghalaya a·dokona napsrukbaenga. Meghalaya a·dokona gipin a·song gita aro a·dokrang gitaba niam gri napsrukbaengani a·sel a·doko songdongenggipa Tribal-rangna kenchakna nangani ong·enga,” ine Thabah aganaha.
Bangladesh a·songo ong·enggipa obostarangni bidingo KSU-ni membor-rangko, mongsongbate sima jolrango donggiparangko mikrake dongchina aro nirikkichina u·iataha ineba ua aganaha.
Bangladesh a·songo sinjetanirangko man·e India a·songona katnapbaenggipa manderangko ma·mong sorkari, mandeska channe a·songo nokchakna miksonganirang donggenchimoba ia manderangko salgro salaram a·dokrango, mongsongbate Meghalaya a·doko nokchakna man·jawa ineba KSU-ni general secretary mikrakataniko on·angaha.
“1947 aro 1971 bilsirango Bangladesh a·songoni katnapbagipa manderangko salgro salaramni dingtang dingtang biaprango nokchakahani a·selan katnapnagipa aro Tribal manderangni gisepo nanggrikanirangko nikna man·aha. Uni gimin chinga indakgipa obostako da·o chagrongtaina nangnikjaenga,” ine Thabah aganaha.
KSU general secretary-ni u·iatani gitade, Bangladesh a·songo songdongenggipa Khasi manderang baksa uamang agangrikataha aro uano uamang da·o dipet maming neng·nikanirangko chagrongna nangkujaenga ine ma·sina man·aha.
“Bangladesh a·songo songdong a·chaenggipa Tribal-rang da·o dipet maming sinjetani aro uandake neng·nikanirangko chagrongna nangkujaenga indiba uamang neng·nikanirangko chagrongna nanggenchimode, uamangko chel·chakna gita ja·kurangko de·gen,” ine Thabah parakataha.