A·dokni ASHA worker-rangna tablet-rangko sualata

SHILLONG: Sombar salo, Health Department-ni ning·o donggipa National Health Mission-ni gita dingtangmancha program-ko Shillong songjinmani Pasteur Institute-o ong·atangenba, a·dokni ASHA worker-rangna aro ASHA Facilitator-ragna tablet-rangko sualataha.
Ia program-ko ong·atanio a·dokni Health Minister Ampareen Lyngdoh, mongsonggipa sokgipa ong·e bak ra·angaha aro tom·anio Health department-ni Principal Secretary Sampath Kumar, DHS (MCH & FW) Dr JS Momin, DHS (R) Dr W Kharlukhi aro Health department-ni officer-rang aro gipin kam ka·giparangba dongpae bak ra·angtokaha.
Ia program-ni ning·o ASHA-rangna ge 7084 aro ASHA facilitator-rangna ge 335 Tablet-rangko NHM-ni gita suale on·angaha.
Ia tablet-rangko, ASHA aro ASHA facilitator-rang, an·tangtangni kamrango jakkalna man·na gita salantini kamrango nangchongmotgipa application aro gipin kamrangkoba donaha.
Ia program-ko ong·atanio, a·dokni Health Minister Ampareen Lyngdoh, jinmana aganprakengon, ASHA-rang, an·tangtangni man·gnirangko somoi gita man·jaenga ine badi ka·ahani gimin iani bidingo Chief Minister aro NHM baksa agangrikaha aro ua somoion ASHA-rangna tablet-rangko on·na gitaba Health Ministry tik ka·jolangaha ine parakataha.
An·tangtangna sualatgipa tablet-rangko name jakkalchina didiatengon,ia tablet-rango on·gimin data-rangko gimaatjana gita password-rangko done jakkalchina Lyngdoh ku·pattiangaha.
Ian tablet-ko jakkalna gita ASHA-rangna namgipa chol ong·enga ine janapatskaengon, ia App-rangko jakkalenba ASHA-rang, an·tangtangni man·gnirangko a·kangna man·gen ine Health Minister aganaha.