B’desh-ona badingsrukatenggipa chinirang baksana sak 3-ko BSF rim·a

TURA: Bangladesh a·songona badingsrukatna miksonge gari bolsao ra·angenggipa chinirangko Sombar salo, 181 Battalion BSF-ni sipairang, South Garo Hills a·jani simao rim·na man·aha aro ia chinirang baksana mande sakgittamkoba rim·aha.
Chini badingsrukenggipa manderangni bidingo koborko man·soani ja·man 181 Bn BSF-ni sipairang, sima jolrango re·ruraenggipa garirangko am·sandiangaha aro uandaken gari bolsako rim·na man·aha.
Ia garioniko BSF sipairang am·sandion, an·chengni ning·ao dongnue ra·angenggipa kg 1000 chinirangko man·aha ine BSF official-rang parakataha.
Ia chinirangko man·ani ja·man BSF sipairang, garini driver aro gipinrangko sing·sandion, uamang ia chinirangko salani maming lekkarangko mesokna man·jaha ineba official-rang parakataha.
Ja·mano rim·a man·gipa chinirang aro mande sakgittamko BSF-ni sipairang, Dalu-ni customs office-na pakwate on·ataha.
Batanggimin bilsirangonin India a·songni chinirangko niam gri Bangladesh a·songona badingsrukengani gimin BSF aro Police-rang, nirok sandianirangko dake, bang·en chinirangko aro chini badingsrukenggipa manderangko rim·na man·ahachim.
Ia sal somoirango Bangladesh a·songo so·sojengjeng ong·engani gimin simarang gita re·ruraani aro badingsrukanirangkoba sorkari, chu·gimik champengatahachim.