SHILLONG: Re·anggipa April jao ong·atanggipa Lok Sabha election-o BJP-ni dakchakanichisa Congress dolni candidate Saleng A Sangma, Tura parliamentary constituency-o chena gita man·aha ine Tura-ni MDC aro BJP-ni state vice president Bernard N Marak ku·jokani ja·man, a·dokni BJP-ko National People’s Party (NPP)-ni dilgipa aro a·dokni Cabinet Minister Rakkam A Sangma matnangatskaaha.
Ia chang Lok Sabha election-o Congress dolna chakpaaniko on·aniara India a·songni politics-o skanggipa changna Congress aro BJP-ni bakrime kam ka·aniko mesokani ong·aha ineba Sangma matnangataha.
“Congress dolna BJP kamrangko dakchake on·gen ine chinga maming dakeba chanchisoanirang dongjachim indiba da·o iako BJP-ni dilgipa Bernard Marak an·tangan parake on·aha. Election-o BJP-ni Congress dolko cheatna gita kam ka·ani ian itihaso skanggipa ong·gen,” ine Rakkam aganaha.
Tura parliamentary constituency-o BJP-na sak 70,000-oni 80,000-mangni gita voter-rang donga ine janapatengon, a·bachengonin ua Lok Sabha election-o BJP-ni dilgiparangko Congress-na campaign ka·ako nikahachim ine Rakkam parakataha.
NPP-ko BJP janggilchini su·ahama ine sing·anina aganchakaniko on·angengon, politics-o ong·ronga gitan BJP, NPP-ni kosako ‘penalty’-o goal-ko chipaha aro iani giminsa a·dokni Chief Minister aro NPP-ni national president Conrad Sangma-ba BJP baksa bakrimjawaha ine parakatmanaha ine Rakkam aganaha.
Dolgnini gisepo dakchakgrikengon, ku·sikoni ong·na nangja indiba ka·tongonisa ong·na nanga ineba a·dokni Education Minister aganaha.
Lok Sabha election-o BJP, Meghalaya a·dokni parliamentary seat damgnion susagija NPP-na chakskana gita tik ka·ahachim ine nikna man·a.
Indake ong·genchimoba, Lok Sabha election-o Tura-ni gital Lok Sabha MP aro Congress dolni dilgipa Saleng A Sangma, BJP-ni dakchakaniko bi·aha aro BJP-ni dakchakanichisa ua chegipa ong·aha ine adita salrangna skang, Tura-ni MDC aro BJP-ni state vice president Bernard N Marak parakatskaaha.
