SHILLONG: Meghalaya Legislative Assembly-o kam ka·enggipa mande saksako Mongolbar pringo, uni asongchakgipa biapon sie dongako man·aha aro ia mande, nangana bate drugs ba pekatgipa samko biji su·ahani a·sel siahakon ine police-rang chanchichipenga.
Koborko on·ani gitade, ia mandeara Meghalaya Legislative Assembly-o chowkidar-ni kamko ka·enggipa Lachuman Shrestha ong·achim aro uni sie dongako Assembly-o kam ka·enggipa manderangsa nikenba police-rangna u·iataha.
Police-rang ua biapona sokbaon, ia mandeni chokkio asonge sie dongakosa nikeaha aro uni jakrani jako biji pongsa aro table-o drugs-rangkoba nikna man·aha.
Ia mande, nangana bate an·tangko drugs su·ahani a·selsa siahakon ine police-rang chanchichipengon, uni siani a·selko talbate ma·sina gita am·sandina a·bachengataha.
Ja·mano ia mandeni manggisiko post mortem ka·na gita Shillong Civil Hospital-ona watataha.
