SHILLONG: Dingtang dingtang biaprangoni Meghalaya a·dokko nina aro rona re·baenggipa tourist-rangna naljokaniko aro a·dokni biaprangni gimin talate on·na man·na gita joltangni chadamberangkon ‘Tourist Assistant’ dake rakkina sorkari tik ka·aha.
Budbar salo, Shillong songjinmani State Convention Centre-o tourism-ni kamko ka·enggipa dingtang dingtang dolrangna program-ko ong·atanio iako a·dokni Chief Minister Conrad K Sangma parakataha.
Chief Minister-ni aganani gitade, ia kamrangara, tourist guide ba dingtang dingtang biaprangona re·dilani, tourist-rangna naljokaniko on·ani aro joltangtango donggipa biaprangni bidingo tourist-rangna agan-talate on·anian ong·gen.
“Dingtang dingtang biaprangoni a·dokona re·baenggipa tourist-rang naljokaniko man·china aro biaprangni gimin kakketko ma·sie ra·china gita a·dok sorkari, joltangni chadamberangkon ‘tourist assistant’ dake kamo rakkina miksongenga,” ine Chief Minister aganenba, iako dakanichi joltangni chadamberangna janggi tangani cholrangko on·skagen ine parakataha.
Adita salrangna skang, dingtang dingtang dolrangni niamrangko jaktango ra·anichi Tourism-o nangchakeaniko ra·baani gimin janapatskaengon, a·doko Tourism-ko tang·doatna gita iandake niam pe·anirangko pilakan jegalgrimchina Chief Minister didiangaha.
“A·doko tourism-ko tang·doatna gita chingni chanchirimanio chinga jatni dilgiparangko, joltangni dingtang dingtang dolrangko aro tourism-ni kamo bak ong·enggipa pilakkon rimnapenga. Batanggimin bilsidokni gisepo Meghalaya a·doko tourism-ko tang·doatna gita chinga dingtang dingtang kamrangko a·bachengataha,” ine Sangma aganaha.
A·doko tourism eco-system-ko namdapatna gita ku·pattianirangko on·chinaba ua dingtang dingtang dolrangko didiangaha.
Ia program-ko ong·atanio a·dokni Chief Minister aro Tourism Minister Paul Lyngdoh, autumn tourism calendar-koba oprake on·angjolaha aro ia bilsio ong·atna sienggipa program-rangara, November 12 tarikoni 14 tarikona Shillong Literary Festival, November 15 aro 16 tarikrango Shillong Cherry Blossom Festival, November-ni 29 aro 30 tarikrango Me·gong Festival, December-ni 6-7 tarikrango The Hills Festival, December-ni 10 tariko Bryan Adams-ni concert, December-ni 12-oni 14 tarikona Winter Tales aro gipinrang ong·enga.