TURA: North Garo Hills a·jao Rongmatchu SSA UP skul nokni obosta namsrangjahani a·sel skulo poraienggipa chatro chatrirang aro skigiparangba neng·nikanirangko chagrongna nangenga ine A·chik Holistic Awakening Movement (AHAM) Kharkutta regional unit parakataha.
AHAM Kharkutta regional unit-ni parakatani gitade, ia skulko nokking grisa chalaienga aro uandaken da·o wachini somoirangode skulo poraienggipa bi·sarangsan ong·aigija skulo skigiparangba neng·nikanirangko chagrongna nangtokenga.
“Ia skulko chinga nieon, ia skulni classroom-rango aro skigiparangni asongchakenggipa kuturioba nokkingan dongja ine chinga nikna man·aha. Skulo skie on·enggipa saksani chingna aganani gitade, ia skulo nokking dongjani a·selan ki·taprang nosto ong·na nangenga aro iani a·selan neng·nikanirangko chagrongna nangtokenga,” ine AHAM Kharkutta regional unit-ni secretary Amity Riprang Marak parakataha.
Marak-ni parakatani gitade, ia skulni bidingo skigiparang, Kharkutta-ni MLA-naba changni chang u·iatahachim indiba maming dakchakanirangko man·kujaenga ine skulni skigiparang uamangna u·iataha.
“Uni gimin chinga August-ni 14 tariko, District Mission Coordinator (DMC)-na sedoatenba, ia skulni neng·nikanirangko janapataha. Garo Hills-o indinan lekka poranio namen ja·manchakenga aro iandake skul nokrang namjanichi obostarangko namjabatatenga,” ine AHAM Kharkutta regional unit-ni dilgiparang parakataha.