Tura: Dadenggre aro Raksamgre -ni teacher-rang niamgri teacher ba skigipa post-na niamgri manderangko rakkienga ine matnangako Chokchokia Deficit UP School-ni School Managing Committee (SMC) kakket ong·ja ine jechakataha aro SDSEO-koba ia mamlako u·ija dakani gimin sing·doataha.
Meja August 8 tairko damgni sub division-ni teacher-rang Director of School of Literacy (DSEL)-na chittiko seate, school authoroty-ni kosako am·sandianiko dakchina mol·molataha. SMC, niamgri skigipa post-na mandeko rakkienga aro school-ni headmaster Utpal Arengh-ba kamo dongkamja ine matnangaha. Indiba SMC-ni secretary, matnangako kakket ong·ja ine jeataha.
“School-ni kosako matnanganirang kakket ong·ja. School-o maimancha ong·chongmotenga, iani gimin darangba mamingko u·itokja. Uandake am·sandiani somoio CSOs napdraa ine janapaha, kakketde darangba dongja aro darangkon okama dongja. Iarangna agreba angko school-ona sokjaenga ine matnangarang kakket ong·srangja, ine headmaster Areng, aganaha.
Iarang gimikan kamo mande rakkiani giminsa ong·a, chong·motde teacher-rangni matnangani dingtang mamlasa ine agankuaha.
Saksa teacher ba skigipa Kenedy Ch. Momin sagini sia ja·man teacher-ni post bangbang ong·aha, jekon SDSEO, talen u·ia.
Uni gimin SMC, sorkarini dongimin niamrangko ja·rike, bangbang ong·gipa post-na advertise-ko on·aha aro interview-ko ong·ataha.
“SMC, candidate-ko interview ra·ani ja·man seoka matchote, approval-na SDSEO-na lekkako watataha, indiba SDSEO, SMC-ni watgipa lekkako ra·chaksojaha aro kamo mande rakkiako ong·gija dake rakkia ine aganaha, ine headmaster aganaha.
Niam gita, deficit school-rangko skigipako rakkiani kamko SMC-na pakwata indake department merit basis-o pangchake mandeko ra·a.
“SDSEO-ni kam kakket ong·ode, me·chikrangni organisation ia mamlako badi ka·on complaint letter-ko soi ka·gipako name dake nina nangachim. Jekon Director School Inspector Dadenggre Sub Division-na on·aha. Indiba SDSEO-de chittiko unasa on·na ine a·kangaha, chong·motde uni designation-ara Sub Divisional School Education Officer (SDSEO)-sa ong·a, Director School Inspector ong·ja ine secretary aganaha.
