SHILLONG: Umiam-oni Assam a·doko donggipa Barak Valley-ona High Speed Corridor-ko tarina siengoba, a·dokni mitam songrangde iana an·tangtangni a·arangko on·na jechaktokskaenga.
Ia High Speed Corridor ba ramako gong kror hajal 20,000-na baten koros ong·e tarina siengani gimin ian Meghalaya a·dokna dingtanganiko ra·baani chol ong·engachim.
Indake ong·genchimoba, official-rangni u·iatani gitade, ia ramani km 27.5-oni km 30-ona ga·akenggipa Diengpassoh songni manderang, ia ramana an·tangtangni a·arangko on·na jechaktokenga aro apsan daken West Jaintia Hills a·jaoba Mawkyndor, Lad Mukhla aro Mukhla Mission songrang, ia ramana an·tangtangni a·arangko on·na jechaktokskaenga.
Ramako dingtang biap gita NHIDCL tarina man·jawaha aro badiaba biapko dingtangatna nanggenchimode ia ramani bang·bata bakrangon nangchakeaniko man·gnok ine janapatskaengon, ia project-na da·o DPR-ko tariengaha ine official-rang parakataha.
Sorkari a·arangko on·genchim ong·ode ia bilsini gisepon NHIDCL, dal·begipa project-ko jako ra·na sienga ineba official-rang parakataha.
Ia high speed corridor-ko Umiam-oni a·bachenge, Shillong Bypass, Mawryngkneng, Ratacherra gita bon·kamao Assam a·dokni Cachar a·jao donggipa Panchgram-o bon·atena siengachim aro ia ramani bakroaniara kilometre 160-mang ong·engachim.
