SHILLONG: Congress dolni MLA sakgittam, National People’s Party (NPP)-o napahaoba da·o dipet a·dokni Cabinet-ko gital dake sualpiltaikujawa ine a·dokni Chief Minister Conrad K Sangma parakataha.
“Da·o dipet chinga Cabinet-ko sualpiltaikujawa aro da·o ong·enga gitan ong·angkuaigen aro kamrangko apsan daken chinga meli-nangrime ka·angkuaigen,” ine Sangma aganaha.
Congress dolni MLA sakgittam, NPP-o napahani gimin Cabinet-o asongenggipa United Democratic Party (UDP)-ni minister sakgnioni saksako ra·galnaba gnang ine chanchichipanirang ong·kattokengachim.
Congress dolni MLA sakgittam, chong·motan Umsning-ni MLA Dr Celestine Lyngdoh, Mawhati-ni MLA Charles Marngar aro Nongstoin-ni MLA Gabriel Wahlang, re·anggipa Sombar salo, NPP-o napangaha aro uamangni napanichi da·o NPP-o MLA-rang sak 28-oni sak 31-ona tang·doangahachim.
Congress dolni MLA-rangna Cabinet-ni biapko on·na ku·rachaka ine agananiko jegalatskaengon, ia MLA sakgittam, maming niam grisa NPP-ona re·baaha aro uamang an·tangtangni constituency-rango namroro silroroaniko nangnikengani giminsa NPP-ona re·baaha ine Chief Minister aro NPP-ni national president parakataha.
