SHILLONG: Sakgittam Congress MLA-rangni NPP-o ja·napeanichi, Meghalaya Legislative Assembly-o NPP-ni bilakani chu·gimik ong·ahaon, MDA baksa bakrimenggipa gipin dolrangoni, uamangni kosako maiba ong·gija dakgenchimode, uamangna jajrengani sokbanaba donggnok.
MDA sorkario NPP da·ode an·tangtangan House-o nanga gita bil chu·ongahani gimin ba majority ong·ahani gimin, uamang baksa bakrimgipa dolrangoni maiba meligrikgijani ong·genchimode ra·galainaba donggnok ine janggipa koborrangba dongenga.
Indake ong·genchimoba MDA Sorkarioni indakeba talen paraksakenga je, UDP-na maming kenchakani dongja, maina MDA baksa bakrimaoniko UDP-ko ong·katna aganna gita Chief Minister, Conrad Sangma mamingkoba aganani dongja.
Sorkari baksa bakrimaoniko UDP-ko ra·galna gita party dilgiparang uanaskango chanchiahachim ingipa koborrangba dongachim indiba Chief Minister Conrad Sangma, UDP-ko chel·chakaha.
A·bachengode BJP-ko a·rikgalnaba donga ingipa koborrangsa jangachim, indiba iade ong·nan man·jaenga, main Ma·mong BJP-an sorkariko rikskaenga aro NPP-ni re·dilgipa MDA Sorkari, BJP-chin Ma·mongoniko dakchakaniko man·skaenga.
Indakeba aganritingarako knaenga je ra·galode HSPDP-ko ra·galnaba donga, dolsa regional party sakgni MLA-rang baksa MDA Sorkario bakrimenga, uamangoni saksade Cabinet-o biapko man·enga.
Unbaksana, party-ona napbagitalrangna sanaba cabinet-o biapko on·genchimode, haida da·oni badiba minister-rangde kamtangko gimaatnaba donga ine kenchakanirangba ong·enga.
Unomitingo Meghalaya Legislative Assembly session-ni ja·mande haida Cabinet-ko jujaatnaba donga ineba jangenga.
Indake ong·engon, Congress-ni koboro parakani gitade, NPP, Opposition dilgipa Ronnie V Lyngdoh-koba party-o napchina aganachim, indiba NPP mikkang re·baenggipa 2028 Assembly poll-o name dakna man·jawa ine niksoenba napna jechakahachim.
