SHILLONG: Sak 60 MLA-rang donggipa Meghalaya Legislative Assembly-o da·o Congress dolni MLA saksasan dongaiahani gimin Leader of Opposition (LO) ba Opposition dolko dilgipani kamkoba Congress dol gimaatgnok.
Mylliem constituency-ni Congress MLA Ronnie V Lyngdoh-ko re·anggipa 2023 bilsini June 8 tariko, Opposition dolni dilgipana seokahachim aro Gambegre-ni gitcham MLA Saleng A Sangma-ko Opposition dolni Chief Whip-na seokskaahachim ine nikna man·a.
Ua somoio Congress dolo MLA salbonga dongkuengpitichim indiba re·anggipa April jao, Gambegre constituency-ni Congress MLA Saleng Sangma, Tura-ni gital MP-na seokako man·e MLA-ni kamko watangani ja·man, Congress dolo MLA sakbrisan dongaiahachim.
Ia MLA sakbrioni sakgittamba, Congress doloni suspend ka·ako man·e Sombar salo National People’s Party (NPP)-o napangaha aro uandaken da·o Congress dolo MLA saksasan dongskaaiaha.
Indake ong·engon, Opposition dolrangoni da·o Trinamool Congress (TMC)-o MLA sakbonga aro Voice of the People’s Party (VPP)-o MLA sakbri dongkuengani gimin Opposition dolko dilna gita TMC-an bil dongbatgipa ong·skaengaha.
Saleng Sangma-ni kam watangani ja·man da·o Gambegre constituency-na gital MLA-ko seokna gita by-election-ko bakan ong·atna nangengaha.
