Sak 3 Cong MLA-ni NPP-o napanganiara tangkachi breanisa ine matnanga

SHILLONG: Sombar salo, Congress dolni MLA sakgittam, chong·motan Umsning-ni MLA Dr Celestine Lyngdoh, Mawhati-ni MLA Charles Marngar aro Nongstoin-ni MLA Gabriel Wahlang-ni National People’s Party (NPP)-o napangani ja·man, ian NPP-ni MLA-rangko tangkachi breanisa ong·aha ine Congress dol matnangataha.
Congress dolni MLA sakgittam NPP-o napangani gimin NPP-ni dilgiparangko matnangatengon, “NPP-o tangka bang·a aro ian uamangni gipin dolni dilgiparangko breaniko mesokani ong·a. NPP-o napanggipa MLA-rang an·tangtangan, NPP-ni ku·rachakanirangko parakaha,” ine Mongolbar salo, Congress dolni working president Deborah C Marak parakataha.
MLA sakgittamni NPP-o napanganichi da·o ong·atna sienggipa Gambegre bye-election-o Congress dolna nangchakeanirang donggenma ine sing·anina aganchakaniko on·angengon, Gambegre-o NPP, Congress dolko bon·atsrangna nangnikenga indiba Gambegre-ni manderang uamangna bate seng·batskaa ine Marak parakataha.
“Sakgittam MLA-rangni NPP-o napanganichi Gambegre-o maming dakeba Congress dolni gadangko ra·onna man·jawa,” ine ua aganaha.
Batanggimin somoirango, sakgittam Congress MLA-rangni NPP-o napanganiara Congress dolna gittamgipa changna bilgriataniba ong·ahachim.
Indake ong·genchimoba, ia dilgiparangni wate katanichi Congress dolna maming dakeba nangchakeaniko ra·bajawa maina Congress dolo dilgiparang bang·en donga aro manderangsa uamangko seokenga ine Congress dolni dilgiparang a·kangskaenga.
“Da·o changgipin election-oba manderangsa dilgipako seokgen aro ia saksa sakgni dilgiparang gipin dolrango napangaiani gimin manderangde apsan ja·kuko de·jawa. Iako an·ching adita salrangna skang ong·atanggipa MP election-oba nikna man·aha,” ine Marak aganaha.
Party-ko wate katgipa dilgiparangni gimin chanchiana bate, onbatgipa gadangrangon party-ko bilakbatatna gitasa Congress da·o kamko ka·na nangengaha ineba ua aganaha.
Iani bidingo dingtangmancha Congress dolni tom·aniko Bristibar salo ong·atna gitaba tik ka·angaha.