SHILLONG: 2026 bilsiona bilsidokna dongimin term bon·na skang, da·o ong·enggipa Meghalaya a·dokni Rajya Sabha MP Dr WR Kharlukhi, kamtangko watgenchimode uni biapo Tura-ni gitcham MP Agatha K Sangma-ko watatskana miksongenga ine kobor on·ako Budbar salo, National People’s Party (NPP)-ni state president aro a·dokni Deputy Chief Minister Prestone Tynsong jegalataha.
Iani bidingo kobor ra·timgipa manderang baksa agangrikengon, an·tangna dongimin term bon·na skang a·dokni Rajya Sabha MP Dr WR Kharlukhi, kamtangko watna miksongenga aro ua kamtangko watgenchimode uni pal Tura-ni gitcham MP Agatha K Sangma-ko Rajya Sabha MP songskana miksongenga ine agananiko Tynsong jegalatenba, banoni iandakgipa kobor nakataha aro maio pangchake ia koborko on·aha ine sing·doataha.
Ua an·tangni neng·nikanirang dongani giminsa Dr Kharlukhi, kamtangko watna miksongengama ine sing·skaon, ua an·tangni gitasa watenga ong·ode uan dingtang obostaosa ong·aigen ine NPP-ni state president parakataha.
“Dongimin somoina skang ua (Kharlukhi) Rajya Sabha-ni MP ong·aniko watna sikenga ong·ode chinga chanchirimna man·gen indiba da·o dipet NPP-ni gita iani bidingo maming chanchianirang dongkuja,” ine ua aganaha.
Adita salrangna skang Congress dolni sakgittam MLA-rangni NPP-o napanganiara NPP-ko Meghalaya Assembly-o dolsanari bang·batgipa dol ong·ata gitasan ong·aigija Rajya Sabha election-na namgipa gadangoba ong·atahachim.
Una dongimin somoina skangan Kharlukhi, kamtangko watani cholrang dongskaenga aro Rajya Sabha-ni MP-ko seoka nanggenchimode, Meghalaya a·dokni ge·samangmang Rajya Sabha seat-na sakoba NPP-ni gita sandiskana nanggen.
