SHILLONG: Adita salrangna skang, West Garo Hills a·jani Tikrikilla jolo donggipa song damsao, bilsigni ata ong·gipa bi·sa saksani man·gipa sabisiara polio ong·ama ong·ja uko World Health Organisation (WHO) am·sandikuenga ine a·dokni Health Minister Ampareen Lyngdoh parakataha.
Ia bi·sako re·anggipa August-ni 14 tariko, sanna gita Goalpara Civil Hospital-ona ra·angon, poliovirus saa dongakon ine doctor-rang chanchichipna a·bachengahachim.
Indake ong·engon, ia bi·sana da·o doctor-rang name nirok sandianirangko on·enga aro Health department-ni gitaba ia bi·sana gisik on·enga ine Health Minister parakataha. Ia bi·sako hospital-o done sannaniko on·enga aro da·o dipet ia bi·sa namen dongenga ineba ua aganaha.
“Ia gital sabisiko chinga name ma·sichengna nangenga aro ia bi·sani man·gipa saaniara polio ong·bebegenchimode chinga gital tikako tarina gita nanggen,” ine Lyngdoh aganaha.
Ia gital saaniko ru·utbea bilsirangni ja·mansa nikna man·aha ineba Health Minister parakataha.
Lyngdoh-ni aganani gitade, ia bi·sani sample report-rangko a·dokni Health department, Kolkata-ni testing centre aro Mumbai-o donggipa ICMR-NIV-ni laboratory-oniko sengkuenga.
Ia case-ni bidingo Goalpara Hospital-o man·chengani ja·man ia bi·sani sample-rangko porikka ra·e nina watataha ine Health Services (MCH & FW)-ni Director JS Momin parakatskaaha.
“Da·o dipet chinga sample report-na sengkuenga aro report-ko man·chenggijade mamingkoba name aganna man·kujawa,” ine Momin aganaha.
Ia case-ni bidingo WHO-ba am·sandienga aro a·dokni Health department, iani report-naba sengkuenga ine Momin aganaha.
“Indakmitingo WHO-ni staff-rang ia case-ni gimin am·sandina gita Tikrikilla-ona re·angaha aro ia bi·sa baksana songo donggipa gipin manderangni sample-rangkoba ra·aha,” ine ua aganaha.
