MoS Ajay Tamta, Garo Hills-ona re·baa
TURA: Budbar salo, Road, Transport & Highways-ni Union Minister of State (MoS) Ajay Tamta, Garo Hills-ona re·baaha aro Nokrek National Park-ni ja·reko donggipa Daribokgre aro Chandigre songrangona re·angenba AAY-ni nokrang, sorkari skulrang, Aganwadi centre-rang, PHC, CHC aro uandakgipa kamrangko man·chape ma·mong sorkarini dingtang dingtang scheme-rangko niangaha.
Union Minister baksa West Garo Hills a·jani Deputy Commissioner Jagdish Chelani aro dingtang dingtang official-rangba dongpaaha.
Ia songrangona re·angani ja·man Union Minister Ajay Tamta, Tura-onaba re·bae, ma·mong sorkarini dingtang dingtang scheme-rangko nipilna gita dingtangmancha tom·aniko Tura-ni Circuit House-o ong·atangaha. Ia tom·anio, West Garo Hills a·jani Deputy Commissioner Jagdish Chelani, East Garo Hills a·jani Deputy Commissioner Vibhor Aggarwal, Additional Deputy Commissioner (ADC)-rang, aro dingtang dingtang department-ni officer-rangba bak ra·angtokaha.
Ia tom·anio, West Garo Hills a·jani Deputy Commissioner Jagdish Chelani, power point presentation-ko dakanichi dingtang dingtang kam aro scheme-rang, jekai Pradhan Mantri Awas Yojana Gramin & Urban, Har Ghar Jal Yojana, Mission Indradhanush, Pradhan Mantri Poshan Abhiyan, PM Ujjwala aro uandakgipa scheme-rangni bidingo Union Minister of State-na agan-talatanirangko on·angaha.
Ia tom·anio Union Minister of State Ajay Tamta-ba aganprakengon, ma·mong sorkarini dingtang dingtang scheme-rangko name nirokenga aro chu·sokatenga ine an·tangni chu·ongnikaniko parakangenba, Garo Hills-o Horticulture, Tourism aro uandakgipa kamrangkoba nambate chu·sokatkuchina agan-ku·pattianirangko on·angaha.
Songo noko manderangni janggi tangani bewalrangni gimin janapangskaengon, songni manderang a·barangchi re·e attamosa noktangtangona re·bapiltokenga aro iachin uamang an·seng baljoke dongna man·skaenga ine Tamta aganaha.
Garo Hills-ni nitoaniko namdapatenba, dingtang dingtang biaprangoni tourist-rangko salbachina gitaba Union Minister, Garo Hills-ni official-rangko didiangaha.
Tom·ani gnigipa bako ua, NHIDCL, PWD aro uandakgipa gipin department-ni official-rang baksa chanchirimangskaaha aro ia tom·anio NHIDCL-ni Executive Director Biju Patir, Garo Hills-o tarienggipa National Highway-rangni gimin Union Minister of State-na agan-talate on·angaha.
Ia tom·anio PWD official-rang, Dhubri-oni Phulbari-ona Brahmaputra chibimako kabatbaenggipa dolongni gimin talate on·angskaenba, ia dolongko 2028 bilsini September jao matchotna ka·dongenga ine Road, Transport & Highways-ni Union Minister of State (MoS) Ajay Tamta-na parakataha.
