RSS aro BJP-ni ku·wattimgipa ine NPP-ni dilgipako MPCC prez matnanga

SHILLONG: RSS aro BJP dolrangna ku·wattimgipa ine Bristibar salo Meghalaya Pradesh Congress Committee (MPCC)-ni president Vincent H Pala, a·dokni Deputy Chief Minister aro NPP-ni dilgipa Sniawbhalang Dhar-ko matnangataha.
Congress dolko Meghalaya a·doko bon·atna bang·jaengaha ine adita salrangna skangsan NPP-ni dilgipa Sniawbhalang Dhar aganahachim.
Uni iandake agangipa kattarangko jegalatskaengon, BJP aro RSS dolrangsa Meghalaya a·doko Congress dolko bon·atna nangnikenga aro Meghalaya a·doko Sniawbhalang Dhar aro uni company-an niam gri drugs aro koelarangko badingengani gimin ua an·tangko naljokatna gita BJP-ni pal ku·rang on·skaengakon ine Pala matnangataha.
CBI aro Intelligence gita dakgipa agency-rang uona re·bae Dhar-ni bidingo sing·sandironga ine janapatengon, da·o file-rangko tarimanaha aro itihasan sawa Sniawbhalang aro Pala ong·a, ukode mesokaigen ine Pala parakataha.
Bang·a dilgiparang, chief minister-rang aro gitcham minister-rangba pattokon dongenga ine janapatskaengon, uamang BJP-ni pal ku·rang on·na nangaigen ong·jaode uamangko BJP-an bon·ataigen ine MPCC-ni president aganaha.
BJP aro RSS-ni pal ku·rangko on·anichi a·dokni Deputy Chief Minister an·tangko jinmana mesokaha ineba ua aganaha.
Uaba NPP-o napna miksonganirang dongama ine sing·anina aganchakaniko on·angengon, ua an·tangan NPP-na batede man·e cha·bata ine Pala parakataha.
Congress dolko wate katgipa dilgiparangko uamang nokchakpilaigenma ine sing·skaon, party-ko wate katgimin dilgiparangkode gelsrangchina aro party-nasan ong·aigija a·songna kam ka·nagipa aro skia man·gipa chadamberangkosa sandichina gita AICC-ni dilgipa Rahul Gandhi, uamangko ge·etmanaha ine Pala aganaha.
Uni dilanio Congress dolni bang·a dilgiparangan bon·angtokengahani gimin uko MPCC-ni president ong·aoniko ra·galchina nangniktokengama ine sing·anina aganchakaniko on·angengon, MLA-rangoni darangba uni kosako matnanganirang dongja aro uni kosako agangipa manderangba party-ko wate re·angmantokaha ine Pala parakataha.
Congress dolko wate katanggimin dilgiparangba da·o party-ona re·bapilna nangniktokenga aro 2028 bilsini Assembly election-ode bang·a dilgiparangan Congress dolni tikitna dorgastorangko galtaignok ineba MPCC-ni president parakataha.