SHILLONG: Mejal Sukro-bar saloni a·bachengatenggipa Assembly-ni Autumn Session-ni skanggipa tom·anio, Chief Minister Conrad Sangma, be·en an·sengjani gimin dongpajaha. Indake De-puty Chief Minister Prestone Tynsong-sa uni biapo ka·chakaha.
U·iatani gita, chief minister be·en an·sengjani gimin noko neng·take dongaha.
Dingtangmancha gisik on·aniara, meja mangmango NPP-o ja·napanggipa sakgittam Congress MLA-rangoni Celestine Lyngdoh saksasan Session-ona re·baha, Charles Marngar aro Gabriel Wahlang-de re·batokjaha.
Unomiitngo autumn session-o adita salrangko ra·dapchina gita VPP MLA, Adelbert Nongrum mingsa amendment motion-ko dakahachim, indiba uni dabianiko House-o jechakaha.
Indake Session-ko badita salna ong·atgenchim uko Business Advisory Committee ra·chakmanaha aro sal ra·dapna man·jawaha ine Parliamentary Affairs Minister Prestone Tynsong aro Assembly Speaker Thomas Sangma janape aganaha.
Indake ong·engon, session-ni somoikode on·dapna aganaha indakoba salrangko ra·dapna man·jawa ine aganskaaha.
Chief Minister-ni donggijao Deputy Chief Minister uni biapko ra·e Assembly-ni autumn session-ko a·bachengaha. Sal ra·dapaniko dakgija Session-ko donsogimin salrangonasan ka·anggen, maina sal ra·dapna agananiko House-on ra·chakjaha.
CM hospitalo sanenga
Scrub typhus ba rokomsa jo·ong chikachi ong·gipa sabisiko rim·a man·ani ja·mano Chief Minister, Conrad Sangma-ko Shillong Civil Hospital-o sananiko dakenga.
Chief Minister Conrad Sangma-ko Shillong Civil Hospital-ni private ward-o sanenga aro ua be·en ding·pretprete saenga ine koborko man·soaha.
Koboro gita ua Scrub typhus saako man·enga ine uni pilak report-rango ma·sina gita man·aha, uko NEIGRIHMS aro Shillong Civil Hospital-ni doctor-rang nirokenga.
