SHILLONG: Congress dolni MLA sakgittam, National People’s Party (NPP)-o napangani ja·man ia dilgiparangko NPP, tangka paisarangchisa breaha ine matnanganirang ong·katahani gimin iani bidingo name sandirokanirangko dakchina gita a·dokni gitcham Chief Minister aro Trinamool Congress (TMC) parliamentary party-ni dilgipa Mukul Sangma-ba an·tangni nangnikaniko parakataha.
“Da·o sorkariko chalaienggipa manderang, iani bidingo kakketko aganna nanga aro manderangba iani bidingo uamangko sing·na nangchongmota. Ia dilgiparangko uamang niam gri man·gipa tangka paisarangchisa breenga ong·ode ia tangkarangara banoni re·baa,” ine Sangma aganaha.
Drugs, niam gri koela badingani aro tol·gipa contract-ni kamrangko ka·e man·gipa tangka paisarangchi MDA sorkari, opposition dolrangko bon·atna jotton ka·enga ine adita salrangna skangsan, Meghalaya Pradesh Congress Committee (MPCC)-ni president Vincent H Pala aganahachim.
Iani bidingo manderangna sing·na nangchongmota aro sorkari kakketko aganna nanga ine janapatengon, ua an·tangan iarangni bidingo koborrangko man·soahani gimin ua an·tangba ia kattarangko bebera·a ine Mukul parakataha.
“Attamo police bazaar-ona re·angaibo aro Shillong-ni dingtang dingtang biaprangona re·angaibo, na·simang ong·gija dakanirangko nikna man·aigen aro ian a·dokni skotong songjinmaon ong·enga. Dilgiparang jak dongjagenchimode iandake ong·gija kamrangko jakgitele ka·na man·genchimma? Iani bidingo sorkariko chalaienggiparang kakketko mesokna nanga aro iani bidingo sandirokchina anga an·tangba didienga,” ine ua aganaha.
NPP-chi dilenggipa MDA sorkarini, gipin MLA-rangko rime katengani gimin janapatskaengon, “Angni ma·siani gitade, iandake gipin dolni dilgiparangko rime kataniara ian skanggipa ong·ja aro ru·uta somoirangonin ong·engaha,” ine TMC-ni dilgipa aganaha.
2018 bilsio maikai Ranikor-ni MLA, NPP-ni jalo ga·akahachim aro maikai 2023 bilsini election ja·man PDF, NPP baksa nangrimahachim, iarangni giminba Sangma gisik ra·atpilaniko on·angaha.
TMC-ni membor-rangkoba rime katna jotton ka·anirang dongama ine sing·anina aganchakaniko on·angskaengon, “Anga angni membor-rango chu·gimik ka·donganirang donga aro batanggimin somoirangoba chinga iakon dake mesokaha,” ine Sangma aganaha.
