TURA: Garoland State Movement Committee (GSMC) mejal Garo Hills Autonomous District Council Tura-ni Chief Executive Member (CEM) aro Deputy Chief Executive Member-ko grongaha. Autonomous District Council-o dingtang dingtang mamlarango niangani ba ja·ku de·angani bidingo grongaha. An·chingni jakgitelgipa dakna nanggniko kam ka·angna songdongkamgipa manderangna bilrangko on·manaha. Jakgitelaniko man·ani ja·manmangmang 1952 bilsionin International Legislation, a·dokska ku·monggrike soi ka·anirango aro international Law-o songdongkamgipa manderang an·tangtangan sima arirangko tariaha. Songdongkamgiparango convention aro tribal manderang songdongkamgipa manderangko chonikaoniko ba on·e ra·aoniko aro dingtangman uamangni bilrang, Customary Law-rang, a·arang, a·jarang, gamjinrang, kamrang aro an·seng-baljokani aro ugita dakgiparangko chel·chakna ong·a. Indakoba songdongkamggipa manderang, a·dok dakna nanggnina, economic gadangrangna, ku·sikrangna, jatni daka rika bewalrangko ripingna aro a·dokni gamjinrangna jeon uamang jatni daka rikao pangchakanirangna neng·nikanirangko chagrongenga.
The Garoland State Movement committee, Memorandum-ko mejal Garo Hills Autonomous District Council-ni chugipa gadangna on·aha. An·chingni bilrangko ripingna aro songni nokmarangna uamangni sima ari gimiko niamrangko name dake rakkiangna ge·etanio uamangni bilrangko ranta ka·na jakgitelaniko on·a nanga, ine chinga janapataha, jekai, Nokmarang uamangni A·king a·jaona niamgri napbaenggiparangko chel·chakna bilko on·a. Gipin jatrangko chel·chakna Garo Hills Autonomous District Council-o bil donga. Ong·telaigipa gamjinrangko ripingna. Jatni dakbewalrangko ranta ka·na, jatni daka rikako, aro ku·sikrangko ripingna. Garo Customary Law (GCL)-na ta·rake aganchakangna. Council-ni revenue-rangko jakkalangna aro kam ka·giparangna tik tak dake dormaharangko on·angna. An·chinngi manderangko didiani dake songdongkamgipa mingsinggipa manderangna Autonomous District Council-ni gita award-rangko on·angna. Finance rule aro service rule aro ugita dakgiparangko GDC dona nangchongmota.
Kosako janapatgipa bakrangko Autonomous District Council-ni chubatgipa bilrangni gita bon·kame nianggen aro iarang gimikan uamangni jakon ong·engaha. Da·o dipetnade uamangni aganchakanirang nama. An·chingni bilrangko man·a uamangni EC-rangko GSMC gisik ra·ataigen, ine Garoland State Movement Committee CEG HQ Tura-ni acting chairman aganaha.
