Niamgri bol salruragiparangko Phulbari GHADC forest department rim·a

Phulbari: Phulbari-o niamgri bolrangko badingsrukgiparangko rim·na Phulbari DHADC-ni Range office am·sandianiko dakangkuanio uamang rake kamrangko ka·angaha.
Koborrangko man·soani gitade, August 22 tariko iarangko office biaprangona ra·bana skang forest department niamgri bol salanggipa bolgni garirangko rim·aha. Phulbari biapo mejamangmang bol ratgipao tanggitik am·sandianiko dakangaha jeon damgni bol ratgipa mill-rangko chipataha aro uamangoni lak damrangni bol ratgipa bosturang aro bolrangko rim·aha.
Forest official-rangni parakatani gitade, August 22 tariko attam 5:45 bajirango Rajbala a·jaoni songtang CSO-rangni dakchakani baksa forest staff-ni gita Batabari-oniko gnigipa changna rim·aha, skanggipa changko apsan salo Phulbari range-oni gipin dolchi attam 5 bajirango Rongmachokgre song sepang joloniko rim·aha.
Indakgipa chanchigijagipa kamrangchi nosto ong·ataiako man·jana gita an·chingni buring bolgrimko aro kamrangko chinga name dake nirok simsakangkugen. An·chingni buring bolgrimrang nosto ong·angtokengaha jeon mitam manderang an·tangtangna mangmangsan namgnirangko chanchie dakenga. Ia indakgipa kamrangko dingtangmancha dondipatna nangengaha, indakgipa kamrangko an·ching a·gilsak gimiko chagrongenga,” ine forest official aganaha.