TURA: North Garo Hills-ni Nameram songo project-ni fund-rangko VEC President aro Secretary jakkalsretaha ine matnanganiko sandichina gita Tura-ni saksa social activist Cherian Momin nangnike aganaha, jeni bidingon FIR ka·genchimoba sandianiko dakgija donchipengachim.
“See rakkiani gitade, Deputy Commissioner, Mihali Chandra, IAS, sandianiko dakchina gita inquiry order-ko re·anggipa December 2023-on P.T.D. Sangma, MCS-na pakwatahachim. Indiba rasonggrie ua somoimitingo sandianirangko dakjaha. Indake ja·mano, re·anggipa June jao, inquiry order-ko on·taiaha aro sandianiko dakchina gita Leena Daring, MCS, Additional Deputy Commissioner-na kamko pakwataha. Indake ong·genchimoba ua kamrang da·alonaba uanbaibai dongenga” ine Momin uni badi ka·gipa chittio janapaha.
Momin-ni aganani gitade, project-ni tangka-paisako jakkalsretaha ine da·sikkari November 24 tarikon, saksa job card donggipa- Pillip Marak, Kharkutta Police Station-ni Officer in Charge-o FIR ka·ahachim, jeon North Garo Hills-ni Nameram songo dilsa CC Pavers Block Ramako tarina gita miksonge Mahatma Gandhi National Rural Employment Guarantee Scheme (MGNREGS)-ni ning·o skilled aro semiskilled laborer-rangna aro hajira ka·gipa job card donggiparangna tangka paisarangko chamatahachim ine matnangaha. FIR-o janapani gitade, ia project-na Gong lak 5-ko chamatahachim, jekon VEC dilgiparang aro uamangni nokdangni manderang jakkalsretaha ine matnangahachim.
“Job card donggiparangni sing·on, semi skilled labourer-rangnade maming tangka-paisa chamata dongja ine VEC Secretary tol·e aganahachim. Indake ong·engon, RTI ka·gipao man·skaani gitade Secretary-ni tol·e mesokanirangko rim·a man·skaahachim. A·selrangko Block Development Officer (BDO)-ona badi ka·enba November 2, 2023 tariko sandianiko dakani ja·mano dongspa hajirarangko on·china gita Secretary-ko aganoba da·alona kingkingba on·kujaenga” ine Momin aganaha.
Momin-ni aganani gitade, VEC secretary, job card donggiparangni jegalaniko minggija, a·palchini manderangko rimbae kam ka·ataha. Aro job card donggiparangni bimingrangko uamangni u·igijao attendance sheet-o segatahachim.
Indake manderangni namgnina sorkarini on·atenggipa scheme-rangko jakkalsretaniko ta·rake namedake sandianiko dakatchina gita Momin, authority-rangko didiaha.
