SHILLONG: KHADC aro JHADC-ni term ba somoiko, NPP-ni rikdilenggipa MDA sorkari gipin jadokna ra·dodaptaina chanchienga ine koborrango separakani ja·mano, District Council election-rangko ra·dotaina gita a·dok sorkarini ja·ku de·aniko State BJP jegalaha.
Constituency-tangtangni manderang uamangni dilgiparangko 2019 bilsio bilsi bongana seoke watataha, unigisepon bang·a constituency-rangon uamangni dilgiparangko dingtangatna siktokenggnok ine BJP-ni kobor on·timgipa M Kharkrang, Sombaro kobor ra·timgiparangna parakaha.
“Sorkari, maina voter-rangni bilko jakkalna gita chol on·jaenga,” maina nangai nangijai somoirangko ra·dosimsime dongna nanga, Kharkrang aganaha.
Kharkrang-ni aganani gitade, iarang namgipa chin ong·jaenga, aro maiba namgnina ong·jaode election-rangko dontongatna nangja. Constituency-rangko sima ariko tik ka·na gita kam ka·enga, ian nama indiba ia kamrangko ia bilsi September jaon matchotatani ga·aktenga, ua aganaha.
“Constituency-rangko sima-ari tik ka·aniko matchotatani gimin sawa aganna man·a, una Council-ni somoiko ra·dosimsimna man·aia ia ong·ja,” Kharkrang aganaha.
KHADC aro JHADC ia ge·gni district council-rangni term ba somoiko ra·dokuchina gita District Council Affairs (DCA) Department, Cabinet-ona de·e ra·angnaba donga.
Unomitingo, BJP-ba District Council poll-rango uamangni candidate-rangko susaatgenma ine sing·on, party-ni memborrang ADC poll-rango susaataniko nangnikode, party uamangni chanchianirangna do·gakode oe on·gen ine ua aganchakaha.
