SHILLONG: Meghalaya a·doko kam ka·enggipa journalist-rangni namgnina a·dok sorkari, gital scheme-ko ra·gatna aro dongchakanirangkoba on·na miksongenga ine Mongolbar salo, a·dokni Information & Public Relations (I&PR) Minister Ampareen Lyngdoh parakataha.
Journalist-rangna on·enggipa medical welfare scheme-ni bidingo South Shillong-ni BJP MLA Sanbor Shullai-ni sing·anina aganchakaniko on·angengon, 2009 bilsini Journalists Welfare Scheme-ni ning·on journalist-rangna sanna banani cholrangkoba on·enga ine I&PR Minister parakataha.
2009 bilsini Journalist Welfare Scheme da·o gitchamaha ine ku·chakangengon, journalist-rangna gong lak 35-ni namgnirangko on·dapnagipa gital scheme-ko sorkari ra·gatna miksongenga aro journalist-rangni siani somoio on·gipa gong lak 1 tangkakoba da·o gong lak 5-ona bariatna sorkari cholko nienga ine Lyngdoh parakataha.
Journalist-rangko sanna bannanio dakchakna gita sorkari da·o on·enggipa gong 50,000 tangkako gong lak 3-ona bariatna gitaba tik ka·aha ineba ua aganaha.
Kamoni neng·takangenggipa journalist-rangna pension-ko a·bachengatnaba sorkari cholrangko nienga ine janapatengon, journalist-rangko private company-rangsa kamo rakkiengani gimin sorkari stipend-ko on·na gitade man·jawa indiba journalist-rang pilakan japrako gong 15,000-na komibate dormahako man·na nangja aro journalist pilakkon EPFO-ni niamrango man·chapna nanga ine I&PR Minister aganaha.
Journalist-rangni changa sapanirangko bariatna gita dingtangmancha skie on·anirang dongna nanga ine Nongpoh-ni MLA Mayralborn Syiem-ni agangipa kattarangna aganchakaniko on·angskaengon, journalist-rangna skie on·na gita dingtang dingtang biaprangona rimangronga ine Minister parakataha.
Tol·gipa koborrangko champengna gita sorkari, adita niamrangko ra·gatna miksongenga ineba I&PR Minister parakataha.
Journalist-rangni namgnina sorkari gital scheme-ko ra·gatna miksongenga
Date:
Share post:
