SHILLONG: Dingtang dingtang department-rango bangbang ong·e dongenggipa aro sanction ka·gimin kamrangko gapatna gisiko nangjaenga ine Mongolbar salo, Opposition Trinamool Congress (TMC)-ni dilgipa Mukul Sangma, a·dok sorkariko matnangataha.
“Sorkarini miksonganirangko anga sing·na sikenga. Sanction ka·gimin bangbang ong·e dongenggipa dingtang dingtang department-ni kamrangko gapatna gita maini gimin sorkari gisiko nangjaenga,” ine Assembly-ni Autumn Session-o Sangma sing·doangaha.
Ampati-o donggipa sorkari skulni gimin toe janapangengon, “Sanction ka·gimin post-na gong 30,000 dormahako on·e kamo rakkina gitasa advertisement-ko on·aha, maini gimin? Ian niamni a·palo ong·enga” ine Sangma aganaha.
Sanction ka·gimin post-rangni kosako Supreme Court-ni rai on·aniko janapatskaengon, “Maini gimin anga gong 30,000-kosan man·na nanga? Ian ra·seke ra·anisa ong·enga,” ine TMC MLA aganaha.
Iandake bangbang ong·e dongenggipa kamrangko sorkari, miksongmanchae gapatjaenga aro sorkarina mikrakatanirangkoba knachakna gisiko nangjaenga ine Sangma aganaha.
MPSC result-rangko parakanio niamko pe·ani gimin janapatskaengon, ia sal somoirango kamna ra·ani bewalrang niam gita ong·jaenga aro iako ta·raken namatna nangenga ine Songsak MLA aganaha.
East Garo Hills a·jao District Selection Committee (DSC)-ni gita kamna ra·anio nokdang ge·saoni mande sakbri pass ka·ahani giminba Sangma sing·doangaha.
Skang somoirango a·dokni ritchani ritcha contractor-rang, dingtang dingtang sorkari department-rango kamrangko ka·na gita cholrangko man·rongachim indiba da·alo obostarang namen dingtangaha ineba Sangma, an·tangni suk ong·gijaniko parakataha.
“2018 bilsionin an·ching a·doko namen dingtanganiko nikna man·aha, maina skangode an·chingni chonchongipa contractor-rangba dal·dala kamrangko ka·e cha·pana cholrangko man·paachim indiba da·alo ia contractor-rang kamkon man·jaengaha,” ine TMC-ni dilgipa aganaha.