TURA: South Garo Hills a·jani Chokpot jolo donggipa dingtang dingtang LP aro UP skul nokrang obosta namsrangjahani a·sel, skulo poraienggipa chatro chatrirang neng·nikanirangko chagrongna nangtokenga ine Garo Students Union (GSU) Chokpot regional unit parakataha.
GSU Chokpot regional unit-ni general secretary Spensar R Sangma-ni parakatani gitade, Chokpot jolrango donggipa bang·bata sorkari skul nokrangan obosta namsrangjahani a·sel da·o gita wachini somoirangode class-rangko ra·na man·jae, skulo poraienggipa bi·sarangsan ong·aigija skigiparangba neng·nikanirangko chagrongna nangtokenga.
“Ia skul nokrangara badiabade nokking sela, badiabarangde nokkingan dongja, kelkirang dongja, pakmarang be·a aro badiaba skul nokrangode asongchakanirangba dongsrangja. Iandakgipa skul nokrangko maini gimin MDA sorkari nichanggalenga?” ine Sangma sing·doataha.
Ia skul nokrang nokkingrang dongjae aro nokkingrang selpruruani a·sel da·o gita mikkarang waani somoirangode mikka wachichakesa class-rangko ra·enga aro bi·sarangba mikka wachichakesa skie ra·na nangtokenga ineba GSU Chokpot regional unit-ni general secretary parakataha.
“Iandake chatro chatrirangni skie ra·chakenggipa skul nokrangko a·dokni chief minister Conrad K Sangma, ta·raken nirokatpachina chinga mol·molenga. A·gilsakni seng·aniko ra·enggipa bi·sarangna nambatgipa bida budiko on·na man·genchimode changsao A·chik a·songni bi·sarangba chubata gadangrangona tang·dopana cholrangko man·gen,” ine GSU Chokpot regional unit-ni general secretary parakataha.
Chokpot-o skul nokrang namjani a·sel neng·nikanirangko man·enga: GSU
Date:
Share post:
