TURA: Ru·uta bilsirangonin Dadenggre Civil Division-ko gital district ba a·ja songchina dabitokengon, East Khasi Hills a·jao Sohra-ko headquarter dake gital district songani bidingo sorkari chanchikuenga ine adita salrangna skang, Assembly-ni Autumn Session-o a·dokni Deputy Chief Minister Prestone Tynsong-ni parakatani ja·man Dadenggre-o songdongenggipa manderang suk ong·gijaniko parakattokaha.
“Deputy Chief Minister-ni iako parakatani ja·man Dadenggre jolo songdongenggipa manderang pilakan iani bidingo ka·a ding·chaoaniko ong·kattokaha maina ru·utbea bilsirangonin Dadenggre-o songdongenggipa manderangba dingtang district-na dabitokengachim. Dadenggre-o songdongenggipa manderangni dabianiko knachakna man·jaenga ong·ode maikai da·o East Khasi Hills a·jao gital district-ko songani bidingo sorkari chanchiskana man·engaha?” ine Dadenggre Civil Division-ni ning·o songdongenggipa manderang sing·doattokaha.
Meghalaya a·doko gitchambatsranggipa sub-division-ara Sohra ma Dadenggre ineba Dadenggre-o songdongenggipa manderang sing·doataha.
Dadenggre-ko district songchina dabianiara gital dabiani ong·jachim ine janapatskaengon, a·doko gitchambatsranggipa sub-division-rangoni damsa ong·engani gimin Dadenggre-kon skanggipa district songchengna nangenga ine Dadenggre jolo songdongenggipa manderang dabiangaha.
“1999 bilsio Donkupar Roy-ni chief minister ong·engmiting somoion Dadenggre-ko district songchina dabichakatahachim. 2012 aro 2015 bilsini gisepo Dr Mukul Sangma-ni chief minister ong·engmiting somoirangoba changni chang iani bidingo a·dok sorkarina sedoatahachim. Uni ja·man 2018 bilsio gital sorkariko rikahani gimin chinga changni chang NPP sorkari aro a·dokni Chief Minister Conrad K Sangma-naba memorandum-rangko on·ahachim indiba da·alona kingkingan Dadenggre-ko district songchina dabianiko sorkari chu·sokatkujaenga,” ine adita salrangna skangsan GSU Western Zone (North) Dadenggre-ni dilgiparangba parakatahachim.
East Khasi Hills a·jani ning·on, Sohra-ko headquarter dake gital district songchina dabianiko a·dok sorkari niengkua ine Budbar salosan, a·dokni Deputy Chief Minister Prestone Tynsong parakatahachim.
Sorkarini kamrangko manderangona sepangbatatna gita East Khasi Hills a·ja ning·on gital district-ko songna gita chanchie nichina Trinamool Congress (TMC)-ni dilgipa Charles Pyngrope, a·dok sorkarina ku·pattianiko on·angahani gimin Deputy Chief Minister, iako aganahachim.
