SHILLONG: Assembly-ni Autumn Session-o a·dokni Education Minister Rakkam A Sangma-ko aganchakna on·jachina dabianiko Assembly-ni Deputy Speaker jechakani ja·man Bristibar salo, Opposition Voice of the People’s Party (VPP)-ni membor-rang, Assembly-oni ong·kate kataha.
Da·o ong·atenggipa Autumn Session-o Dadenggre Sub-Division-o skigiparangko kamo ra·ani bidingo VPP-ni dilgipa aro Nongkrem MLA Ardent Basaiawmoit chanchirimaniko ra·baaha aro dingtang dingtang jatni gisepo meligrikgijaniko ra·baahani gimin Education Minister-ni kosako FIR ka·aha ine aganenba, iani bidingo Chief Minister ba Deputy Chief Minister-sa aganchakaniko on·na nanga ine ua didiangahachim.
Iani ja·man a·dokni Deputy Chief Minister Prestone Tynsong chakatenba, membor-rangni kosako iandake matnanganirangko dakna man·jana gita niamrang donga ine talataniko on·angaha. Iani bidingo Assembly-o chanchirimna ra·baahani giminba ua VPP-ni membor-ko sing·doangaha aro niamni kosako re·badejachina didiangskaaha.
Iani ja·man Deputy Chief Minister aro VPP MLA-ni gisepo adita jegrikanirang ong·angaha aro Education Minister saksa MLA ong·e jinmana ia kattarangko aganahani giminsa ua iako Assembly-ona ra·baaha ine Basaiawmoit aganchakaniko on·angskaaha.
Sakgnini gisepo adita jegrikani ja·man, a·dokni Education Minister-ko aganchakna gita Assembly-ni Deputy Speaker on·aha aro iako jegalenba VPP-ni membor-rang, Assembly-oni ong·kate kattokaha.
A·dokni Education Minister Rakkam A Sangma-ba an·tangni aganchakaniko a·bachengatengon, skia man·gipa manderangde jegrikgija talgriknasa jotton ka·aha ine aganskaaha.
