SHILLONG: 2019 bilsioni 2024 bilsiona bilsi bongani gisepo, North East Special Infrastructure Development Scheme (NESIDS)-ni ning·o rama dilsniko tarina gita Meghalaya a·dokna gong kror 404.35-ko ra·chakmanaha ine Sukrobar salo, Meghalaya a·dokni Deputy Chief Minister aro PWD (Roads) Minister Prestone Tynsong, Assembly-ni Autumn Session-o parakataha.
Autumn Session-ni bon·kamgipa salo, dingtang dingtang membor-rangni sing·anirangna aganchakaniko on·angengon, ia gong kror 404.35-oni gong kror 276.88-kode Ministry-oni a·dokna watatmanaha ine Tynsong parakataha.
Kamko matchotatna dongimin somoini bidingo janapatengon, ia project-rangna Final Work Order (FWO)-ko on·aoni ja 24-ni gisepon matchotna nanga ine Deputy Chief Minister parakataha.
Ia project-ko PWD (Roads) jako ra·e ka·enga ineba Tynsong aganaha.
