SHILLONG: Catchment area ba mikka chi chimongchakram biaprangko kanganio a·a nokgiparang aro dingtang dingtang dolrang baksa niamrangko nambate ja·rikna man·na gita a·dok sorkari, Meghalaya Protection of Catchment Area Act 1990-ko bilakbatate taridapna miksongenga ine Sukrobar salo, a·dokni Chief Minister Conrad K Sangma, Assembly-o aganaha.
A·doko chiring chibisikrang tiproroangengahani gimin aro chirangko chu·onga gita man·jaengahani gimin mikka chi chimongchakgipa biaprangko nambate nirokchina gita iana skang, Mawsynram-ni UDP MLA Ollan Sing Suin, a·dok sorkariko didiangahachim.
Apsan daken, Mawkyrwat-ni UDP MLA Renikton Lyngdoh Tongkhar-ba joltangtango donggipa catchment area-rangko chel·chakchina gita songni nokni dilgiparangko didianichi ia Act-ko taridapchina gita a·dok sorkariko didiangaha.
Iana aganchakaniko on·angskaengon, Meghalaya Protection of Catchment Area Act 1990-ni ning·o a·a nokgiparangni permission gride mikka chi chimongchakgipa biaprangko tarina maming cholrang dongjani gimin ian namen neng·beani ong·enga ine Chief Minister parakataha.
“Uni gimin ia niamko bilakbatate tarina chinga cholrangko nienga. Ia Meghalaya Protection of Catchment Area Act 1990-ko taridapna skang sorkari, songni nokni dilgiparang aro a·a nokgiparang baksa apsan chanchirimchenggen aro pilakni namnikani gitasa ia niamko taridapna man·na gita pilak dolrangni agan-ku·pattianirangkoba ra·gen,” ine Sangma aganaha.
Ia Act-o parakani gitade, advisory board-ni ku·pattiani aro a·a nokgiparangni permission-ko man·ani ja·man kragipa biaprangko catchment area ine sorkari parakna bil dongachim indiba da·o dipet sorkarini catchment area ine mingna gita seokgimin pilak biaprangon a·a nokgiparangni permission-ko sorkari man·kujaenga ineba ua aganaha.
Ia catchment area-rangan, chiring-chibimarangko ong·ate, jillarangona, songrangona aro dingtang dingtang biaprangona chirangko on·skana sienggiparang ong·a ineba Chief Minister aganaha.
“Uni gimin ia chasongni aro mikkang chasongrangni namgnina anga Assembly-ni pilak membor-rangko aro a·a nokgiparangkoba sorkari baksa bakrime kamko ka·china mol·molenga,” ine Sangma aganaha.
Protection of Catchment Area Act-ko sorkari bilakbatatna miksongenga: CM
Date:
Share post:
