SHILLONG: A·doko na·tok gosusaataniko regulate ka·na a·dok sorkari chanchienga ine Chief Minister Conrad K. Sangma Sukrobar salo aganaha.
Meghalayya Legislative Assembly-ni bon·kamgipa Autumn session-o Amlarem-oni UDP MLA Lakhmaen Rymbui-na uni aganchakanio parakangaha, Conrad meja batanggimin salrango ong·atgiparangko gisik ra·ataiaha, na·tok gosusaaniko uamangni gadango ong·atna am·gipana a·jatangni deputy commissioner-rangoniko permission-ko ra·ronga aro uano maming lekkarango sea jotanirang dongja, a·doko regulate ka·ani system-ko dakna chanchiaha.
“Da·o chinga na·tok gosusaataniko regulate ka·na kamrangko ka·angengaha. Na·tok gosusaaniko ong·atanggiparangna chinga guideline-rangko tariangengaha aro nangchongmotgipa stakeholder-rang baksa agangrikaniko daknaba donaha, Mehalaya-o namen mingsingenggipa na·tok gosusatanirangko ong·atenga ine Chief Minister aganangaha.
Regulate ka·anichi a·dok sorkarina revenue-ko man·a dakchakani ong·gen ine u·iataha. Na·tok gosusaataniko ong·atenggiparang mikkangchi gosusaataniko ong·atna songtango na·tok jile cha·enggiparangoniko na·tokrangko breangchina a·dok sorkari didigen ine Conrad aganaha.
Bilsiantio a·doko chang 500-na bate na·tok gosusaanirangko ong·atenga aro ia gosusaaniko ong·atna gipin a·dokrangonikosa lak 3-ni gita na·tokrangko ra·baenga ine mejamangmang tom·anio Rymbui aganaha.
Na·tok gosusaatenggiparang gipin a·dokrangoniko na·tokrangko bregija Meghalaya a·doktangonikon brechina a·dok sorkarina UDP MLA ku·pattiaha.
Uni parakatani gitade, na·tok gosusaaniko ong·atangna gipin a·dokrangoniko lak 3 kg-rangko kror 10-ni gita brebaenga.
