SHILLONG: 2021-2022 aro 2022-2023 bilsini gisepo Meghalaya sorkarini gro-jinang tang·dobatahani gimin Assembly-o mesoke on·anggipa Comptroller & Audit General (CAG)-ni report-o mikrakataniko on·angaha.
CAG-ni report-o parakani gitade, ia gro-jinangrangara market loan-rang, dingtang dingtang bank-rangoniko ra·gipa loan-rang aro ma·mong sorkarioniko man·soenggipa tangka paisarangni gro-jinangrangan ong·achim.
2022-2023 bilsio, a·dok sorkarini gro-jinang gong kror 14,637.12 gapaha aro ianoni gong kror 11,285.50-de market loan-rang, gong kror 1,349.04-de bank-rangoniko ra·gipa loan-rang aro gong kror 2,002.58-de ma·mong sorkarioniko man·sogipa loan-rang ong·a ineba CAG-ni report-o parakaha.
2021-2022 bilsio a·dok sorkarini gro-jinang nanggipara gong kror 12,165.98 ong·skaachim aro uandaken 2022-2023 bilsini gisepo sorkarini gro nangani 20.31 percent-chi bariangaha. Ian ma·mong sorkarioniko loan ra·ani 117.40% aro market loan 13.79 percent tang·doahani a·sel ong·aha.
CAG-ni report-o parakani gitade, a·dok sorkarini grorang, 2019 bilsini March 31 tariko gong kror 10,623.68 ong·achim indiba 2023 bilsini March 31 tarikode gong kror 18,442-ona bariangaha.
Dam 11 salgro salaram aro Himalayan a·dokrangni gisepo gro jinang batgiparangoni Meghalaya a·dokan gittamgipa ong·enga ine janapatengon, “Ian Meghalaya a·doko gro jinang batroroenganiko mesokani ong·enga aro ia gro jinang nanganiko komiatna gita sorkari ja·kurangko de·jagenchimode ja·mano dal·en gro jinang nanganio ga·aknaba gnang,” ine CAG mikrakataniko on·angaha.