SGH KVK-ni gita training program-rangko ong·ata

TURA: South Garo Hills a·jao CAU-KVK-ni gita ICAR-ATARI, Zone VII-ni 100 Days Action Plan-ni ning·o salbongani vocational training program-rangko re·anggipa August 27 tarikoni August 31 tarikona, South Garo Hills KVK campus aro Warima songo ong·atangaha.
Ia minggni training program-rangoni mingsade songni manderangna na·tokni ma·manti cha·ani bosturangko tariani aro minggipinde Integrated Pest Management (IPM) Inputs-ni bidingo skie on·anian ong·achim.
Ia training program-rangko ong·atanio skie on·gipa manderangara, KVK-ni Subject Matter Specialist (Fisheries) Thongam Monika Devi aro SMS (Plant Protection) Dr Tanya R Marak ong·a.
Ia training program-rangko ong·atani bidingo SGH KVK-ni Principal Scientist aro Head Dr Athokpam Haribhushan talataniko on·angengon, “Na·tokoniko ma·manti cha·ani bosturangko tarianichi songni nokni manderang, an·tangtangna man·dapanirangko tarina man·a aro uasan ong·aigija songo noko na·tok jile cha·enggiparangna u·i-ma·sie ra·na gita namgipa chol ong·a,” ine parakataha.
Ia training program-rangko ong·atanio gimik sak 100 manderang bak ra·angaha aro training matchotani ja·man uamangna certificate-rangko suale on·angaha.