TURA: Tura-oni Dalu-ona gital tariangenggipa ramako bilsidok ong·pilengahaoba matchotchipkujaengani a·sel rama gita re·ruraenggipa manderang aro ramasamrango songdongenggipa manderang neng·nikanirangko chagrongna nangtokengahani gimin ia ramako ia bilsini bon·anganichibara jedakeba matchotatchina ia ramako tarienggipa contractor-na ge·etaniko on·angaha ine kobor on·aha. December jani gisepo ia rama tarianiko matchotjagenchimode ia contractor baksa soi ka·grikgimin contract-ko den·galpilgnok ineba kobor on·timgiparang parakataha.
Ia km 50-mang ong·gipa ramara, NH-217 B-ni bakan ong·na siengachim aro a·bachengode ia ramako M Brahma Construction minggipa company-na on·ahachim. Ia company, 38 percent-mangni kamko matchotani ja·man tangka paisani gita neng·nikanirangko man·e, gipin company-na sub-contract on·skaaha aro da·o ia ramako tariani bilsidok ong·pilengahaoba kamrangde 66 percent-ni gitasan matchotskakuengachim.
Ia ramako tarianio, NHIDCL-ni official-rangba nitimenga aro uamangna PWD-ba dakchakanirangko on·engachim.
NHIDCL-o kam ka·enggipa official saksani u·iatani gitade, kamko a·bachengna skang 90 percent a·arangkode pakwatna nangachim indiba a·arangko pakwate on·ningjahani a·sel kamrang ja·manchakatako man·aha aro unbaksana court case-ni a·selba kamrang ja·donggaatako man·na nangahachim.
“Chingna da·oba km 3.5-mangni gita ramarangko pakwate on·kujaenga. Uni gimin ia km 3.5 rama baksa ba ia rama griba, ia chu·gimik ramako ia 2024 bilsini December jani gisepon jedakeba matchotatchina chinga, ia ramako tarienggipa company-na ge·etaniko on·aha,” ine NHIDCL-ni official parakataha.
Koborko man·soani gitade, ia ramao donggipa bang·bata a·a nokgiparangan sorkarini on·gipa compensation-rangkode man·tokaha indiba a·arangko pakwate on·skakujaengachim.
Indake ong·engon, bilsidok ong·pilengahaoba ia ramako matchotkujaengani gimin bang·a manderangan suk ong·gijaniko parakattokaha.
Tura-Dalu ramako ia bilsini bon·angachibara matchotchina contractor-ko ge·eta
Date:
Share post: