TURA: SSA skulrango skienggiparangni dormaharangko bariatchina aro kamrangk regularize ka·china dabie All Garo Hills SSA School Teachers Association (AGHSSASTA), a·dokni Chief Minister Conrad Sangma-na sedoattaiaha.
AGHSSASTA-ni parakatani gitade, SSA skulrango skigiparangni dormahako 2008, 2010, 2013 aro 2016 bilsirango bariatahachim indiba 2017 bilsionin da·alona kingking dormaharangko bariattaia dongkujaengachim.
Iani bidingo Chief Minister-na sedoatengon, petrol aro ma·manti nangchongmotgipa bosturangni damrang salantian bariroroengoba skigiparangni dormaharangkode bariatkujaengani a·selan skigiparang, neng·nikanirangko chagrongna nangtokenga ine AGHSSSTA parakataha.
“Mandeni nangchongmotgipa bosturangde salantian dam bariroroenga indiba chingni dormaharangkode 2017 bilsionin bariatchipkujaengani a·sel chinga nokdang chalaianio namen neng·nikanirangko chagrongna nangtokengaha. Uni gimin skigiparangni dormahakoba bariattaichina chinga sorkariko mol·molenga,” ine association-ni dilgiparang parakataha.
Skigiparangni dormahako personal bank account-rangona chipate on·ani, 2016-17 PAB-ni bangki dongenggipa jachetni arrear-rangko aro da·ororo somo gitan dormaharangko ia sorkari on·engahaoba, dormaharangko bariatchipkujaenga ine janapatskaengon, SSA skulrango skigiparangnaba ta·raken dormahako bariatchina aro skigiparangni kamko regularize ka·china gita AGHSSASTA, a·dokni Chief Minister Conrad Sangma-ko didiataha.
