TURA: 2023 bilsio Tura-o Talent Hunt program-ko ong·atanio, tol·gipa fund letter ba tangka on·ani chittiko on·e cha·bokaha ine Garo Hills Talent Development Society (GHTDS), Meghalaya Tourism Directorate-ko matnangataha.
“Ia program-ko ong·atna gita chingna adita tangka paisarangko chamaha ine 2023 bilsini September jao, Shillong-o donggipa Directorate office-oni chingna chittiko seatahani gimin chinga changgnina kingking Tura-oni Shillong-ona re·ange sing·sandianirangko dakon maming tangka paisa chamanirangko chinga man·jaha. Uni ja·man Director-ni chingna seatgipa chittiko mesokchina Shillong Tourism office-o kam ka·enggipa membor saksa chingko aganaha aro Tura-o donggipa District Tourism office-onikoba sing·sandichina aganataha. Indiba Tura office-o kam ka·enggipa mande, Shillong Directorate office-oni maming u·iata dongja ine chingna aganatskaaha,” ine GHTDS-ni membor-rang parakataha.
“Uni ja·man 2023 bilsio, chang 12-gipa Talent Hunt-ko ong·atna chingko dorgasto galtaichina u·iataha. Tangka paisarangko chamaha ine Director-ni seatgipa chittiko chinga September jaon man·soahaoba December jaona kingkingan maming ja·kurangko de·chipjaha aro iani a·sel chingni tangka paisa aro somoirangsa indin bon·aiaha,” ineba GHTDS-ni membor-rang parakataha.
Iandake ‘cha·bokahani’ gimin an·tangtangni suk ong·gijaniko parakatengon, kamtangtangko name ka·jaenggipa department-ni officer-rangni kosako sandirokenba nanga gita ja·kurangko de·china GHTDS-ni membor-rang, bilo ong·enggipa official-rangko, minister-rangko aro opposition dolni dilgiparangko didiataha.
“Tangka paisani gita dakchakanirangko on·china chinga bilsiantian Tourism department-o dorgastorangko galronga indiba da·alona kingkingan chinga drae tangka paisarangko dabia dongja ba department-ni kosako badi ka·anirangba dongkujachim. Indiba iandake cha·bokako man·aniara namen ra·chakna man·gijani ong·a,” ine GHTDS parakataha.