SHILLONG: Gital dake taridaptaigipa Umiam Dam gita re·na on·jaengani a·sel bus aro truck garirang neng·nikanirangko chagrongna nangengani gimin iandake dal·dalgipa garirang Shillong songjinmaona re·rurana dingtang rama gita jabonga ba jadokni gisepon bailey bridge ba tem·na man·gipa silni dolongko tariskana a·dokni PWD miksongenga.
Iani bidingo talataniko on·angengon, Umiam bibraoni Shillong Civil Hospital-ona kingkingan NHIDCL-ni ning·o ong·a aro dingtang ramako tarina gita Detailed Project Report (DPR)-ko tarichina PSU-ko ge·etmanaha ine Budbar salo, a·dokni Deputy Chief Minister aro PWD (Roads) Minister Prestone Tynsong parakataha.
Iani bidingo NHIDCL-ni gitaba consultant ba agan-ku·pattie on·timgipako tik ka·aha aro iana survey-ko adita jarangni gisepon a·bachengnaba dongaha.
Dingtang dolongko rikanio baditaba bilsirangkode nangnaba gnang ine janapatengon, dal·dalgipa garirangna jabonga ba jadokni gisepon bailey bridge-ko dikdiksana rikchengna gita cholrangko nichina ua PWD-ni Chief Engineer-ko ge·etmanaha ine Tynsong parakataha.
“Umiam Dam gita watjaengani gimin walni bus garirang, dolong nalsaon donna gita nangenga aro garirango songre songgabatenggipa manderangni neng·nikanirangko nike anga suk ong·ja,” ine ua aganaha.
Umiam dam aro dolongko taridaptaina skangde gimik garirangkon ia dolong gita re·na wataiachim indiba gong kror 20-mang ong·pile ia dolongko taridaptaiani ja·man, official-rangni ku·pattianio pangchake a·dok sorkari, ia dolong gita dal·dalgipa garirangni re·ruraaniko champengatahachim.