SHILLONG: Niam gri koelarangko aro drugs-rangko badinganio jak donga ine matnanganirang kakket ong·bebegenchimode a·dokni Deputy Chief Minister Sniawbhalang Dhar-ko Cabinet-onikosan ong·aigija a·dokonikon a·rikgalna nanga ine United Democratic Party (UDP)-ni dilgipa aro Cabinet Minister Kyrmen Shylla aganaha.
Iandake Deputy CM-ni kosako Shillong-ni gitcham MP aro Meghalaya Pradesh Congress Committee (MPCC)-ni president Vincent H Pala, re·anggipa August 22 tariko matnangchengahachim aro da·o dipet Deputy CM Dhar-ba an·tangni kosako matnanganirangna maming jegalanirangko dakkujaengachim.
Deputy CM-ni kosako indake matnanganirang ong·katahani gimin a·dokni gitcham chief minister aro Opposition dolni dilgipa Mukul Sangma-ba iani bidingo a·songni Prime Minister Narendra Modi-na sedoatenba, Dhar-ni kosako ja·kurangko de·china didiatna ka·mikkenataniko on·angahachim.
Iani bidingo an·tangni chanchianiko janapatengon, “Sawa ong·a sawa ong·ja anga an·tangde mamingkoba ma·sipaja indiba kakket bichalkode nanga. Uni kosako matnangani gita ua jak dongbebegenchim ong·ode uko cabinet-onikosan ong·aigija a·dokonikon a·rikgalna nanga maina saksa deputy CM ong·e a·doko drugs badinganide namen ong·jawaha,” ine UDP-ni dilgipa Kyrmen Shylla aganaha.
Deputy Chief Minister-ni kosako matnanganirangna sakkirangko mesokskachina gitaba Shylla aganaha.
“Je MLA-ni kosakoba ong·china, jean iandake matnangengachim, uamang sakkirangkoba mesokna man·skana nanga,” ine ua aganaha.
Iani bidingo Prime Minister-na sedoatgen ine Opposition dolko dilgipani ka·mikkenatani gimin sing·on, “Chinga uni seataninan senge dongenga indiba tol·e matnangaigipa kattarangnade maming ja·kurangko de·skana nangja,” ine Cabinet Minister aganaha.
Iandake matnanganirangko sandirokna nanggenma ine sing·anina aganchakaniko on·angskaengon, “Ia matnanganirangko chief minister-ba nikengani gimin uan nanga gita ja·kurangko de·angaigen,” ine Shylla parakataha.
