TURA: North Garo Hills a·jao Kharkutta Assembly constituency-ni ning·o donggipa Adokgre jolni Dobanggal Non-Government LP skul nok namsrangjahani a·sel skulo poraienggipa bi·sarang aro skulo skie on·enggipa manderangba neng·nikanirangko chagrongna nangtokenga ine kobor on·aha.
Skulni president Albert Momin-ni kobor ra·timgiparangna parakatani gitade, ia skul nokni obosta namsrangjahani gimin Education department aro Kharkutta-ni MLA Rupert Momin-naba u·iatahachim indiba da·alonan ia skul nokko taripiltaina gita maming dakchakanirangko man·kujaenga.
“Ia skulo poraienggipa bi·sarang sak 40-mangni gita donga indiba da·o gita mikkarang waahaode, nokkingrang selpruruahani a·sel mikka wachichakesa skie ra·na nangtokenga aro apsan daken skigiparangba neng·nikanirangko chagrongna nangtokenga,” ine skulni president, kobor ra·timgiparangna aganaha.
Songni sordarba ia skul nok namsrangjahani gimin Kharkutta-ni MLA-ko gronge agangrikeahachim indiba da·alona kingkingan ia skul nokko tarina gita maming dakchakanirangko man·soa dongkujaenga ineba skulni president parakataha.
“Ia skul nokni bidingo lekka see ra·anga baditaba chang ong·ahachim indiba da·alonan jolni MLA aro Education department-ni gitaba maming dakchakanirangko on·a dongkujaenga,” ine Momin aganaha.
Indake ong·engon, ia jolrango poraienggipa bi·sarangni namgnina ta·raken ia skulko nirokatchina aro skul nokko gital dake rikpiltaina man·na gita tangka paisarangko dakchake on·china jolo songdongenggipa manderang, a·dok sorkariko didiattokaha.
