Imphal: (IANS) Kuki bobil dol, Manipur-ni gitcham Chief Minister Mairembam Koireng-ni Bishnupur-o donggipa nokko chadrapaha, jeon bilsi 71 ong·gipa budepa siaha aro sakbonga gipin-rang jokkom ong·tokaha. Bilakgipa bomb-chi cha-drapaha ine official para-kaha.
Police-ni u·iatani gita, bobil dolni bilakgipa bomb-ko gitcham CM Koireng-ni nokko nisan ra·e galdape chadrapao saksa siaha. Koireng aro uni nokdangni manderang, a·sel ong·mi-tingo noktango dongtok-jachim.
Sianggipako R.K Rabei minga, ua joltango mani-rongbewal gitan bi·aniko dakna tom·aniko ong·atna tariengachim ua somoio bomb gopretaha. Uandake sakbonga gipinrang jokkom ong·tokaha. Saknaa man·-gipao bilsi 13 ong·gipa me·chik bi·sa donga. Uamangko sanna gita hospital-ona ra·angaha.
Bomb galdape chadrap-gipa biapara Indian National Army-ni (INA) headquater-oni km 2-mang chel·gipa biap ong·a. Jeon bilsi 1944 April 14 tariko Indian National Army-ni Lt Col Shaukat Ali, INA-ni Supreme Commander Netaji Subhas Chandra Bose-ni dilanio skanggipa changna India-ni tricolour ba flag-ko songchengaha.
Indake ong·engon district-oni sak hajal me·asa me·chikrang Sukrobar salo human chain-ko tarie rally ka·angaha. Ian Manipur-o drone-ko jakkale chadra-paniko jegalna jingjenga-taha. Drone-chi charapao sakgni manderang siaha aro sak 12 gipinrang jokkom ong·aha.
Placard aro banner-rangko de·e manderang human chain-ko tarie sorkarini Kuki bobil dolni kosako ja·ku de·jani gimin jing-jengataha.
Coordinating Committee on Manipur Integrity (COCOMI)-ni ong·atgipa rally-o school, college poraigiparang, buchuma-budeparang gimikan bak ra·angaha. Thoubal, Imphal West, Imphal East, Bishnupur aro Kakching district-rango Koutruk aro Senjam Chirang-o chadra-pako jegale jingjengataha.
Human chain protest ba jingjengatao gimik bajar-antiko chipartaha. Rama-rango garikon nikna neng·aha.
September 1 aro 2 tariko Imphal West aro Imphal East district-ni Koutruk song aro Sejam Chirang-o Kuki bobil dol, drone-ko jakkale bilakgipa silchida-rerangchi chadrapaha. Jeon sakgni mande siaha. Sianggipa saksade me·chik ong·a. Indake jolni manderang chadrapaniko jegalna jingjengataha.
