A·dokni sima-arini report-ko somai gita on·a Regional Committee kam ka·enga

SHILLONG: A·dok ning·ni sima-arijolrango niam aro retini obosta gita bang·a neng·nikanirangko aro Deputy Commission-tangtangchi Lok Sabha 2024 General Election-na tarisoani report-ko 2024 September 30 tariko a·dok sorkarina on·china sal dona gita kam ka·anirango Meghalaya-ni Regional Committee-rangna namen neng·beani ong·enga.
Meghalaya-ni Regional Committee-rang uamangni pilak golmal donggipa biaprangko survey ka·aniko manderangna knaata dongkujaenga aro Assam baksa sima-ari mamlako namatna nangenggipa a·jolrangni Meghalaya-oni report-rang tik ong·aha.
A·dok sorkari, Regional Committee-rangni report on·ako sengenga jeon 2024 September 30 tarik dongimin sal ong·enga.
Indake ong·engon Assam-ni Regional Committee pilak meligrikgijagipa biaprangko survey ka·giminko manderangna knaatode aro Assam-oni report-rang tik ong·aiaha ong·ode a·dok sorkari ma·siskakujaenga.
Gnigipa changna agangrikaniko dontonga bilsisa batangaha indiba a·dok damgnini sorkarirang agangriktaina changni chang ka·dongataha.
A·dokni ning·o ga·akgipa sima arirangko bak dakangni bidingo agangrikanirangko dakengon, Chief Minister Conrad K Sangma mejamangmang talataha, jeon Assam baksa gnigipa changna agangrikani rakgipa kam ong·angenga, iano man·chapgipa biaprang namen gamchatgiparang ong·ani a·sel name chanchie ja·ku de·na nangenga, jeon gualni dongna nangjawa.
Ruutatengani bidingo Sangma talatangaha, “Ian man·a sikanina mangmang ong·ja. Gnigipa gadang chanchianio bilongen rakbatgipa aro engtojabatgipaba ong·anggen. Jedakgipa ja·kuko chinga de·gen, chinga namen simsakna nangenga. Iana skanggipa gadang chanchainio chinga ua biaprango bang·a namatna man·aniko nikanio chinga gisiko nangbataha.”
Changgipin agangrikanio sima ariko bak dakanina gnigipa gadang chanchianiko ia bilsini October jaoni a·bachengatna ka·dongsoenga.
Mejamangmang ma·sigipa dam 6 bak dakani point-rang baksa km 885 sima ariko Assam aro Meghalaya suale donga. Gnigipa gadang agangrikani ning·o bak dakgipa am·enggipa biaprangko sakgni Chief Minister-rang wene niangna somoiko tik ka·aha, indiba ia ong·gen ine aganna man·kuja.