SHILLONG: Tura-ni gitcham Lok Sabha MP aro Chief Minister Conrad K Sangma-ni nogipa Agatha K Sangma-ko Meghalaya State Commission for Protection of Child Rights (SCPCR)-ni Chairperson songna ja·kurangko de·ahani gimin Khun Hynniewtrep National Awakening Movement (KHNAM) raken jegalataha.
NPP-ni saksa dilgipako SCPCR-ni Chairperson songengani gimin a·dok sorkariko matnangatengon, “MDA sorkarini iandake bil mesokaniko chinga KHNAM dolni gita raken jegalatenga,” in KHNAM-ni working president Thomas Passah parakataha.
Passah-ni parakatani gitade, MDA sorkarini ning·o dingtang dingtang dilgiparangko, adviser-rang, chairman-rang, vice chairman-rang aro dingtang dingtang gadangrango donatengani a·sel a·dokni tangka paisarangkosa koros ka·na nangenga aro iana a·doko songdongenggipa manderangba bang·en suk ong·gijaniko paraktokahachim.
“Da·o SCPCR-ni chairperson-naba NPP-ko dilgipa manderangonikon seokengani gimin ian MDA sorkarini bil mesokaniko mesokanisa ong·engaha,” ine KHNAM-ni working president parakataha.
Agatha-ko SCPCR-ni Chairperson songanio uni adatang aro a·dokni gitcham minister James K Sangma-sa mongsonggipa mande ong·a ineba KHNAM dolni dilgiparang suk ong·gijaniko parakataha.
“Agatha-ko SCPCR-ni Chairperson songchina gita James Sangma-sa sorkarina see u·iataha ine chinga kobor man·soaha. Ua (James) saksa ramram mandesan ong·e maikai sorkarini kamo aganna gita bilko man·aha? MDA-o bak ong·enggipa gipin dolrangde iani bidingo jegalanirangko dakjawa maina uamangba apsan man·gnirangko man·paenga,” ine Passah matnangataha.