SHILLONG: Meghalaya a·doko Jal Jeevan Mission (JJM)-ni kamrangko name chu·sokatja ine Bharatiya Janata Party (BJP)-ni matnanganiko a·dok sorkari jegalatenba, iani bidingo kamrangko name ka·ja ine Village Water Sanitation Committee (VWSC)-rangko matnangatskaaha.
Sorkari official-rangni parakatani gitade, ‘Har Ghar Jal’-ni kamrango VWSC-rangkoba bak ong·a ine parakatahaoba, JJM-ni project-rangko nirokchina pakwate on·ani ja·man kamtangtangko name ka·jahani a·selsa aro kamrangko nirok sandijahani a·selsa bang·bata biaprangon chirangko man·tokkujaengachim.
A·doko JJM-ni kamrangko name chu·sokatgija ma·mong sorkarina tol·gipa report-rangko on·aha ine adita salrangna skang BJP-ni matnanganiko jegalatengon, JJM-ni portal ba website-o Functional Household Tap Connections (FHTC)-ko 100 percent matchota ine mesokaniara badiaba badiaba songrango kam matchotaniko mesokanian ong·a ine a·dokni PHE Minister Marcuise Marak parakataha. Diltugipa songrango nokrang chel·grikani a·sel kamrangko chu·sokatanio chagrongna nanggipa neng·nikanirangkoba ua talate on·angaha.
Wachini somoirango ramarang namjani a·sel, bijoliko name man·jani a·sel aro chirangko chu·onga gita man·jani a·sel nokdangrangna chirangko name on·na man·jaenga ineba ua aganaha.
Iandakgipa dingtang dingtang neng·nikanirangko chagrongna nangengoba ‘Har Ghar Jal’ program-ni ning·o nokdang ge·antinan chirangko on·na gita sorkari kamrangko ka·enga ineba PHE Minister aganaha.
Songni manderang, an·tangtangni neng·nikanirangko sorkari official-rangna agane on·na man·na gita sorkari, CM Connect aro MegPGRAMS gita dakgipa program-rangko a·bachengate on·aha ineba Marak parakataha.
“Ia programrangan, manderangni neng·nikanirangko knatime ra·na aro ta·raken namate on·na gita cholrangko on·enga. Una agreba, dingtang dingtang songrangoba dingtang dingtang department-ni officer-rang tom·anirangko ong·ate, songni manderang baksa uamangni neng·nikanirangko ma·sie ra·na agangrikanirangko dakaha,” ine Marak aganaha.
Marak-ni aganani gitade, adita salrangna skang, East Garo Hills a·jani Mandalgre songo tom·e chanchirimon, VWSC-ni gisepon meligrikna man·jae JJM-ni kamko galchipahani a·sel kamrang chu·sokgipa ong·na man·jaha ine ma·sina man·ahachim.
Meghalaya a·doko Jal Jeevan Mission (JJM)-ni kamrangko sorkari name chu·sokatgija tol·gipa report-kosa ma·mong sorkarina on·aha ine adita salrangna skangsan, a·dokni BJP dol matnangatahachim.
Ma·mong sorkarina on·gipa JJM-ni report-ko jegalatengon, Meghalaya a·doko bang·a nokdangrangan chi pipe-rangko soke man·kujaengoba JJM-ni report-ode, bang·bata songrangon chi pipe-rangko chu·gimik sale on·a matchotaha ine mesokskaaha ine BJP-ni state vice president Bernard N Marak matnangatahachim.
“JJM-ni bidingo a·dok sorkarini mesokgipa report kakket ong·ja maina songrangona re·ange nigenchimode bang·bata songrangon kamrang matchotgija dongtokkuenga,” ine Marak aganenba, uni am·sandie niani gita bang·bata songrangon chi pipe-rangko soke man·tokkujaenga ine parakataha.
