TURA: September-ni 30 tarikara, 2005 bilsio MBOSE-ni headquarter-ko Shillong-ona apjitangna manchianiko jegale so·sojengjeng ong·anio so·ota man·gipa manderangko gisik ra·ani salsa ong·engani gimin ia salo ong·atna tik ka·gimin porikkako dingtang salona ra·doatskachina Garo Students Union (GSU) dabiangaha.
Iani bidingo Secondary School Leaving Certificate (SSLC) Board-ni secretary-na seachi u·iatengon, “September-ni 30 tarikara A·chikrangna kalimani salsa ong·ani gimin ia salni bako ong·atna tik ka·sogimin Class 10 Selection porikkako dingtang salo ra·skachina chinga mol·molenga,” ine GSU-CEC-ni president Zikku Balgra N Marak parakataha.
Ia salo ra·na tik ka·sogimin porikkako dingtang salo ra·skagenchimode A·chik chatro chatrirang, ia salko manipana man·gen aro porikkakoba maming dongtogijani gri sepana chol man·gen ineba GSU-ni president parakataha.
Bilsi 19-na skang, MBOSE-ni headquarter-ko a·dok sorkarini Shillong-ona ra·jitangna jotton ka·aniko manderangni jegaltokengmiting somoio Tura aro Williamnagar biap damgnion, jegalenggipa manderangko Police-rangni skatang goani a·sel Tura-o sak 4 aro Williamnagar-o sak 5 manderang so·otako man·ahachim. Ia a·sel ong·anio gimik sak 9 manderang so·otako man·angan baksana bang·bea manderang guli nangako man·e saknaanirangkoba man·tokahachim.
Ua apsan salon Baghmara-oba chatro chatrirang aro jolni manderang tom·aniko ong·atengachim indiba ua somoio rang·gitik mikkarang jimbee waahani a·sel manderang noktangtangona re·angpiltokna gita nangahachim aro uandaken Baghmara-o iandake a·sel ong·aniko chagrongna gita nangjahachim.